Бала арманының аралы

Халықаралық балаларды қорғау күніне орай, «Жас Ұлан» балалар мен жасөспірімдер орталығының ұйымдастыруымен мерекелік бағдарлама өткізілді. Іс-шараға Арқалық қаласының балақайлары мен арнайы шақырылған мүмкіндігі шектеулі балалар қатысты.

Мерекелік бағдарлама аясында 12 алаң құрылды. Оның ішінде: асфальтта сурет салу, топтық және мергендікке арналған ойындар, сабынды көпіршіктермен сурет салу, туристік бағдарлау мен жартасқа өрмелеу спорттық жарыстары, «TikTok» әлемі, жанды дауыстағы әндер байқауы мен керамикалық кәдесыйлар жасау алаңы, онымен қоса мүмкіндігі шектеулі оқушыларға арналған шатырлы алаңдар да болды.
Шараның ашылу салтанаты орталық тәрбиеленушісі Қуаныш Нұрдостың көңілді әнімен және қыздарымыздың акробатикалық биімен басталып, орталықтың директоры Ербол Кабылдиннің құттықтау сөзімен жалғасты. Кейін директордың оқу-тәрбие ісі жөніндегі орынбасары Игорь Роговой мерекелік бағдарлама аясында ұйымдастырылған алаңдардың жұмысымен таныстырып өтті. Жоғарыда аталып өткендей, балалар 12 алаң бойынша қызықты әрі көңілді ойындар мен байқауларға (жарыстарға) қатысып, тәтті сыйлықтар мен мадақтамаларға ие болды.

Мүмкіндігі шектеулі балаларға арналған шатырлы ойын алаңында ұсақ моториканы дамытатын және қозғалмалы ойындар ойнатылды. Ал, керамикалық кәдесыйларға арналған алаңда балалар қолөнермен айналысып, үздік жұмыстары үшін мадақтамаларға ие болды. Сондай-ақ, балалар жақсы көретін жылдамдық пен дәлдікке арналған топтық ойындармен қатар жартасқа өрмелеу жарысы көп балалардың назарын өзіне аудартты. Шығармашыл балалардың бір бөлігі асфальтта сурет салса, қалғаны сабынды көпіршіктермен түрлі суреттер салып, көңілді уақыт өткізгендерін айта кеткеніміз жөн.
Осылайша мерекелік бағдарламаға қатысқан барлық белсенді оқушылар іс-шара соңында марапатталып, жанды дауыста кішкентай балалар ән салып, мерекені сәтті нотада аяқтады.

Гауһар ҚАЙСЕРОВА,
«Жас Ұлан» балалар
мен жасөспірімдер орталығының педагогі,
Арқалық қаласы