Балалардың көңілді демалысы

Балалардың жазғы демалысын ұйымдастыру – қашанда маңызды мәселенің бірі. Осы орайда Амангелді ауданындағы Б.Қолдасбаев атындағы ЖББ мектебінде мектеп жанындағы «Күншуақ» жазғы сауықтыру алаңы өз жұмысын бастады.

Балаларға жақсы көңіл-күй сыйлау, ойындар арқылы адамгершілікке, бірлікке, елжандылыққа тәрбиелеу мақсатындағы лагерьдің ашылу жиыны «Біз бақытты баламыз» тақырыбында өтті. Балалар «Туған ел», «Біз бақытты баламыз», «Ертегілер» әндерін шырқады, ал театр үйірмесінің оқушылары сайқымазақ бейнесінде балаларға күлкі сыйлап, жиын соңында тәтті балмұздақтар таратты.
Іс-шараға «Шұғыла» балалар мен жасөспірімдер шығармашылық орталығынан арнайы келген ұстаздар ертегі кейіпкерлері бейнесіндегі киімдерін киіп, оқушыларға қызықты ойындар ойнатып, би билетті. Әрине, асқан белсенділікпен қатысқан балаларға арнайы сыйлықтар да таратылды. Түрлі-түсті бояулармен суреттер салып, балаларға көтеріңкі көңіл-күй сыйлады.

Бірінші күннен бастап-ақ, мектеп жанындағы «Күншуақ» жазғы сауықтыру алаңына қатысушы балалардың күн тәртібі өте қызықты өтті. Таңғы жаттығудан басталған іс-шаралар флешмоб биі, асфальтқа сурет салу, «Көңілді старт» спорттық ойыны, танымдық сабақтармен қатар қуыршақ театрының жұмысымен жарасымды жалғасын тауып жатты.

Әнет ЖҰМАБЕК,
Б.Қолдасбаев атындағы ЖББ мектебі,
Амангелді ауданы