Балаларға пайдалы әрі көңілді демалыс

Жаз басталысымен, еліміздің жазғы сауықтыру лагерьлері балаларды қабылдай бастады. Солардың бірі – Арқалық қаласындағы «Жас Ұлан» балалар мен жасөспірімдер орталығының жанынан құрылған «Жаз Bala Quest» жазғы сауықтыру лагері.

Маусымның 2-сі күні лагерьдің алғашқы ауысымы басталып, орталыққа 40-қа жуық бала жиналды. Олар таза ауада серуендеп, спорт залда жаттығып, әртүрлі спорттық ойындар мен қызықты сайыстарға, танымдық іс-шараларға қатысып, бос уақыттарын мазмұнды әрі көңілді өткізді. Аптасына екі рет бассейнге барып, суда әртүрлі ойындар ұйымдастырылды. Сондай-ақ балалар қаламыздағы тарихи құндылықтарға бай «Облыстық дала өлкесі мұражайына» және Ы.Алтынсарин атындағы педагогикалық университетте орналасқан Ы.Алтынсариннің музейіне экскурсия жасап, көптеген тың мәліметтер алып, түрлі жәдігерлермен танысты.

Әкелер күні мерекесіне орай «Менің әкем – ең жақсы адам» атты фотокөрме ұйымдастырылып, балалардың әкелерімен түскен фотолары жинақталып, солардың арасынан үздік деп танылған жұмыстар марапатталды. Осылайша қызыққа толы лагерьдің бірінші ауысымымен қоштасу үшін балаларды табиғат аясына шығарып, қазақтың ұлттық ойындарын ойнатып, таза ауада дәм татып, көтеріңкі көңіл-күймен уақыт өткіздік. Балалар лагерьмен қимай қоштасып, келесі ауысымға да қатысатындарын жарыса жеткізді. Лагерь барысында балалардың қауіпсіздігі мен денсаулығына ерекше көңіл бөлінді. Тәжірибелі педагогтер мен медициналық қызметкерлер әр баланы мұқият бақылап, қажет жағдай туындағанда көмек көрсетті.
Жазғы сауықтыру лагері – балалардың жан-жақты дамуына, денсаулықтарын нығайтуына, шығармашылық қабілеттерін арттырып, өмірлік маңызды дағдыларды меңгеруіне зор мүмкіндік берді. Біздің жаз мұнымен аяқталған жоқ. «Жас Ұлан» балалар мен жасөспірімдер орталығы жанындағы жазғы лагерь келемін деушілерге жарқын көңіл-күй мен ұмытылмас сәттерге толы демалыс сыйлауды жалғастырмақ.

Айкерім ЫБЫРАЕВА,
«Жас Ұлан» балалар мен жасөспірімдер
орталығының педагогі,
Арқалық қаласы