Балалық шақтың түрлі-түсті әлемі

Арқалық қаласындағы «Жас Ұлан» балалар мен жасөспірімдер орталығының жанынан құрылған «Жаз-Bala Quest» жазғы сауықтыру лагерінің III ауысымында ерекше шығармашылық іс-шара ұйымдастырылды.
Бұл күні лагерь қатысушылары «Кескіндеме және графика» үйірмесінің ұйымдастыруымен өткізілген «Балалық шақтың түрлі-түсті әлемі» атты экологиялық картинкалар байқауына қатысты. Балалардың шығармашылық қабілеттерін дамыту, табиғатты қорғауға баулуды көздеген байқау барысында оқушылар түрлі-түсті бөтелке қақпақтарын қолданып, әдемі аппликациялық суреттер жасады. Бұл жұмыстар эстетикалық жағынан ғана емес, мағыналық тұрғыда да терең болды. Әрбір қатысушы өзінің балалық арманы мен табиғатқа деген сүйіспеншілігін түстер арқылы жеткізуге тырысты.

Байқауға қаламыздың мектептері – Ш.Уәлиханов атындағы ЖББМ, А.Байтұрсынов атындағы бастауыш гимназия, Ы.Алтынсарин атындағы гимназия, А.Құнанбаев атындағы мектеп-гимназия, Б.Майлин атындағы №3 ЖББМ, М.Әуезов атындағы №5 ЖББМ, сондай-ақ Кейкі батыр атындағы №4 ЖББМ, №10 ЖББМ, Ә.Бөкейхан атындағы ЖББМ және №2 ЖББМ жанынан құрылған лагерьлердің оқушылары қатысты. Олардың әрқайсысынан үш оқушыдан шығарылып, өнерлерін паш етті.

Тартысты өткен байқау нәтижесінде бірінші орынға Ы.Алтынсарин атындағы мектеп-гимназия ие болды. Ал екінші орынды Ш.Уәлиханов атындағы ЖББМ иеленсе, жүлделі үшінші орынды А.Байтұрсынов атындағы бастауыш гимназия қанжығасына байлады. Қалған мектеп оқушылары түрлі номинациялар бойынша марапатталып, арнайы Алғыс хаттар табысталды.

«Жаз-Bala Quest» жазғы сауықтыру лагерінің III ауысымы – қатысқан 25-30 балар үшін білім мен демалысты ұштастыра білген, шығармашылық пен спортты, достық пен қызықты сәттерді тоғыстырған нағыз қуаныш алаңына айнала білді. Мұнда әр күн – ерекше форматта өтеді: таңғы жаттығу, сергітетін ойындар, шығармашылық үйірмелер, зияткерлік сайыстар мен мәдени кештер.
Лагерьдегі ерекше демалыс түрлерінің бірі – бассейн. Аптап ыстықта балалар суға шомылып, көңіл көтеріп, түрлі су ойындарын ойнап, қуат алады. Бассейн балалар үшін жай ғана сергіту емес, бір-бірімен достасатын, ерекше естеліктер қалыптастыратын ортаға айналды. Демалыс алаңында балалар уақытты көңілді өткізіп қана қоймай, жаңа дос тауып, топпен жұмыс істеуді, бір-біріне құрметпен қарауды, жауапкершілікті сезінуді үйренеді. Тәжірибелі тәлімгерлер мен тәрбиешілер, өз кезегінде, әрбір баланың жан-жақты дамуына жағдай жасап отыр.
Мұндай байқаулар мен іс-шаралар балалардың өмірге деген көзқарасын кеңейтіп, табиғатқа деген сүйіспеншілігін арттырып, болашаққа сеніммен қарауға үйретеді. «Жаз-Bala Quest» – жай ғана лагерь емес, балалық шақтың жарқын естелігіне айналған нағыз ғажайып әлем.

Нұрайлым МҰХИДИНҚЫЗЫ,
«Жас Ұлан» балалар мен жасөспірімдер орталығы,
«Мобилография» үйірмесінің жетекшісі,
Арқалық қаласы