Бар жақсылық – балаларға

Үстіміздегі жылдың күзінде Қостанай қаласындағы «Юбилейный» шағын ауданында «IQOSTANAY» оқушылар сарайы жастарға есігін айқара ашты. ҚР Оқу-ағарту вице-министрі Наталья Жұмаділдаева Қостанай қаласына жұмыс сапары барысында аталған орданың жай-күйімен танысып қайтты.

Жалпы аумағы 12 мың м2 асып жығылатын үш қабатты Оқушылар сарайына кірген бетте ерекше әсерде қаласың. Іші жарық, кең, жылы. Заманауи үлгідегі барлық қажеттіліктермен жабдықталған қосымша білім беру ордасы өңірде баламасы жоқ әлеуметтік ғимарат ретінде бағаланып отыр. Осылайша облыс орталығының 1300 оқушысы өзінің қызығушылығына қарай шеберханаларда, ғылыми-техникалық, экологиялық-биологиялық және эстетикалық бағыттағы студияларда жан қалауы бойынша өз ісін таба алады. Мұнда балалар үшін соңғы үлгідегі компьютерлер орнатылған киберспорт залы, инженерия кабинеті, робот құрастыру үйірмесі, виртуалды шындық кабинетімен қатар 3D модельдеу бөлмелері, күн батареясы мен жел генераторлары бар жаңартылатын қайнар-көздер үйірмесі, сонымен қоса гидропоника және аквапоника кабинеті, музыкалық аспаптармен әрі бөлек дыбыс жазу студиясымен жабдықталған музыкалық кабинет бар.

Оқушылар сарайына арнайы бет бұрған вице-министр Наталья Васильевнаға қаламыздың білім ордаларынан жиналған жас зерттеушілер, киберспортшылар, робототехниктер мен инженерлер өздерінің алғашқы жетістіктерін ұсынып, жасап жатқан ісінің маңыздылығын жеткізіп, шынайы қызығушылықтарын көрсете білді. Оқушылар сарайының директоры болып тағайындалған Мұрат Нұржанов қонақтарды барлық үйірмелермен толық таныстырып өтті. Наталья Жұмаділдаева жас өнертапқыштар мен зертеушілерге сұрақтарын қойып, оған тұшымды жауап та естіді. Оқушылар жаңа үлгідегі кабинеттерде жұмыс істеудің бір ғанибет екендігін айтады. Әрине, тәрбиеленушілер мен олардың тәлімгерлері заманауи үлгідегі құралдар мен зертханалардың мүмкіндіктерімен әзірге танысу үстінде, оларды алда көптеген ашылулар күтіп тұрғаны анық.

– Барлығы біздің балаларымызға арналған. Мектеп оқушылары жоғары оқу орнына түсуге дайындық жасаймын десе де, мектеп бағдарламаларын қайталаймын десе де – бәріне толық мүмкіндік жасалған. Яғни, үйірмелер соншалықты қызық әрі барлық қажеттіліктермен қамтамасыз етілгендіктен, мұнда барғысы келетін оқушылардың саны көп болады деп ойлаймыз. Оның үстіне мықты деген тәлімгерлер жиналған, – дейді «IQOSTANAY» оқушылар сарайы директорының орынбасары Наталья Никитина. – Тәрбиеленушілерімізді екі ауысымда оқыту жүргізіледі. Бұл, әрине, бірінші немесе екінші ауысымда оқитын балаларға ыңғайлы. Үйірмелерде оқыту да екі тілде ұйымдастырылғанын айта кеткен жөн. Балаларды Mindal электронды жүйесі арқылы тіркейміз. Яғни, ата-ана электронды түрде өтініш береді. Ал біз, өз тарапымыздан, қабылдауға қажетті құжаттар мен талаптарды түсіндіріп, бағыттаймыз.

Жалпы «IQOSTANAY» оқушылар сарайында 24 үйірме жұмыс атқармақ. Жас ерекшеліктеріне келер болсақ, қаламыздың мектеп оқушылары 6-дан 10 жасқа дейін және 10-нан 18 жасқа дейін екі топқа ілігіп, жаны қалаған үйірмеге жазыла алады. Айта кету керек, осы қараша айының 18-інде, яғни сенбі күні таңертеңгі 10.00-ден 15.00-ге дейін барлық қала тұрғындарына ашық есік күні ұйымдастырылмақ. Жаңа орталықтың тыныс-тіршілігімен танысамын деушілер, мархабат.

Жамал ШАУКЕН