Демалыс уақытындағы көңілді кезең

Елімізде жарияланған төтенше жағдайдың жаз мезгілімен тұспа-тұс келуі балалар үшін қиындық туғызғаны рас. Дегенмен «Балауса» жазғы сауықтыру алаңында ұйымдастырылған лагерь балаларды бір серпілтіп тастады.

Тамылжыған жаз. Биылғы үш ай демалысымыз тіптен өзгеше. Әрине, жұқпалы дерттің тарамауы үшін мемлекеттік деңгейде арнайы белгіленген санитарлық шаралар мен қатаң талаптарды сақтау қажеттілігіне байланысты оқушылар да әдеттегі жаз қызықтарынан бас тартса да, мектеп алаңында жаз қызығына бөленді. «Табиғатты аяла» атты тақырыпты қамтыған алаңдағы демалыс бір аптаға созылды. Баршамыз үшін әрине жеке денсаулық пен елдің амандығы маңызды.

Тәрбиешілер қауіпсіздік шараларын үнемі басты назарда ұстайды. Оның ішінде балалардың арақашықтықты сақтауын, қолдарын дезинфекциялап отыруын, маска киіп жүруін, яғни бала өмірінің қауіпсіздігі әркез тәрбиешілердің жіті назарында. «Өз еліңнің табиғатын білесің бе?» сұхбаты мен «Шебер қолдар» қолөнері онлайн түрде ұйымдастырылып, шебер балалар марапатқа ие болды. Сондай-ақ «Қала, аудан, ауыл, көшелер» презентациясы да онлайн түрде назарға ұсынылды.

Артынша А.У. Баймағанбетов ұйымдастырған спорттық ойындар оқушылардың көңілінен шығып, мәз-мейрам болып жатты. Міне, қысқа уақыт болса да Т.К. Хұсаинова, А.К. Кукенова, А.У. Баймағанбетов сынды мұғалімдердің тәрбиешілік етіп, қадағалауының арқасында мектеп алаңындағы лагерь көңілді нотада мәресіне жетті. Балалар да онлайн өткен шараларға белсене қатысып, қабілет-қарымдарын шыңдады. Ата-аналар да ұйымдастырылған ойындарға балаларымен бірге ат салысып, онлайн шаралар бойынша пікірлерін білдіріп жатты.

Әрбір оқушы IV тоқсанды тәмәмдаған соң, жазғы демалысын көңілді өткізуге тырысады. Көптеген балаларды жазғы демалыспен қамту үшін арнайы орындар ұйымдастырылды. Бірінші кезекте жетім және ата-анасының қамқорынсыз қалған балалар, аз қамтылған және көпбалалы отбасылардың балалары, сондай-ақ олимпиада, конкурс жүлдегерлері қамтылды. Санитарлық талаптардың сақталуы қатаң және тұрақты бақыланды. Әдетте қаланың баласы далаға, ауылдағысы қалаға қашады. Ондағысы – мектеп пен үйдің арасында өткен тоғыз айдың есебін түгендеу. Ал биыл бұл жоспар жүзеге аса қоймады. Енді жаңа оқу жылына қадам басқалы отырған балаларға қиын жағдайға қарамастан, бар мүмкіндікті тиімді пайдаланып, сапалы білім алу жолында бар күш-жігерін аямасын деп тілеймін.

Балауса БАЙҚАСЫНОВА,
Мемлекеттік тілде оқытатын
Заречный ОМ бастауыш
сынып мұғалімі,
Қостанай ауданы