Еңбекші ауылындағы жаз

Биылғы Төтенше жағдайға қарамастан, Қостанай ауданына қарасты Еңбекші ауылының негізгі мектебінің педагогтері оқушылардың жазғы демалыстарын көңілді өткізу мақсатында бірқатар бастамалар қолға алынды.

Кез келген баланың асыға күтетін мезгілі – жаз. Қызықты өмір, гүлденген өсімдіктер мен маусымның жылы күндері – бұның бәрі шуақты мезгілдің сипаттары. Сондықтан да жаз мезгілін әр адам асыға күтеді. Мектеп оқушылары үшін де жаз – ерекше маңызға ие. Оның сыры – 9 ай білім алып болған соң, көптен күткен үш айлық демалыстың басталуы. Биылғы карантин жағдайы үлкендермен қатар балаларды да біраз есеңгіретіп жібергені белгілі. Соған қарамастан оқушыларымыздың биылғы демалысының қызықты өтуі үшін тырысып бақтық.



Демалыстарына нәр беру мақсатында Еңбекші ауылының негізгімектебі «Аралға саяхат» атты жазғы алаңын айқара ашты. Балалардың денелерін шынықтыруы үшін спорт алаңы, логикалық ойлау қабілеттерін дамытуға бағытталған шығармашылық алаңдар жұмыс істейді. Онда балалардың бірі сурет салса, бірі түрлі материалдардан бұйым жасап, жеке өнерлерін дамытуда. Жазғы демалыс алаңы балалардың доп қуып, әткеншек теуіп, көңілді демалып жатқан сәттеріне де толы болды.



Спорт алаңдарында шаршауды білмейтін балалардың асыр салып, ойнап жүрген дауыстарын естіп, «осы балалардан бақытты жан жоқ шығар» деген ойға келесің. Алаңсыз балалық шақ деген осы! Мектебіміздің алаңдары туралы айта берсем, әлі де жазар дүние жетерлік. Дегенмен айтар сөзімнің негізгі түйіні: балалардың ойнап-күліп, жазғы демалысты қызықты да көңілді өткізіп, денсаулықтарын нығайтып, мектепке жаңа күш-қуатпен оралулары үшін қолдан келер жағдайдың бәрі жасалды деп ойлаймын.

Гүлфира АРСТАНБЕКОВА,
Еңбек ауылының НМ
директордың тәрбие ісі
жөніндегі орынбасары,
Қостанай ауданы