Кітапхана – оқырман құтханасы

Н.Островский атындағы қалалық орталықтандырылған кітапхана қабырғасында А.Байтұрсынов атындағы ҚМУ-дың филология факультетінің 1-курс студенттеріне танымдыққ эксурсия ұйымдастырылды.

Еліміздің болашағы жарқын болу үшін, ең алдымен ұрпағымыз білімді, рухани деңгейі жоғары болуы қажет. Ол үшін адам көп оқып, көп ізденуі керек. «Кітап – білім бұлағы, білім – өмір шырағы», «Кітаппен кеңес – білімдімен теңес», – деп халқымыз кітапты қашаннан жоғары бағалаған. Бүгінде қарыштап дамып жатқан замандағы жастар мен кітапты байланыстыратын алтын көпір – кітапхана. Кітапхана – оқырманның рухани талап-тілегін қанағаттандырумен қатар әлемдік, ұлттық, әмбебап ақпарат көздерін толық жинақтап, оқырманға жеткізуші рөлін атқарады.

Кітапхана қызметкерлері білім қоры сақталған орданың тарихымен таныстырып, жастарға оқу залының бөлімдеріне жазылым бойынша, жалпы кітапхананың қызмет көрсету бөлімі, әдістемелік және библиографиялық бөлім, жинау және өңдеу бөлімдеріне экскурсия жүргізіп, ақпарат беріп өтті. Кітапхана жанында жұмыс істеп тұрған өнерлі жастарға арналған «Тұмар» үйірмесімен жас қаламгерлерге арналған «Толқын» шығармашылық студиясы және қарттарға арналған «Лада» клубтарының қызметі туралы ақпараттарды студенттер қызығушылықпен тыңдады.

Тыңдаушылар назарына «Өлкетану оқулары», «Іс-шаралар фотошежіресі», «Н.Островский баспасөз беттерінде» атаулы папкалары ұсынылып, таныстырылды. Іс-шара соңында ҚМУ студенттеріне кітапхана туралы мәліметтер қамтылған ақпараттық буклеттер таратылды.

Шынар МАКАНОВА,
Н.Островский атындағы
ОҚК кітапханашысы,
Қостанай қаласы