Отбасы – бақыт мекені

Ғасырлар бойы халқымыз «Отан – отбасынан басталады» деген ұғымның тамырын тереңдетіп, ұрпағының ұлттық тәрбие мен рухани құндылықтары бойына сіңіріп өсуіне ерекше мән берген. Өйткені, мәртебесі биік, мұраты асқақ мемлекет қашанда берекелі отбасынан құралады.

Тағылымды кештің қадірменді қонақтары – қалалық аналар кеңесінің төрайымы Бақытжамал Аяғанқызы және Ғалия Бектайқызы, сондай-ақ қаламыздағы көпбалалы әрі үлгілі отбасылардың бірі – Бөлтіріковтер отбасы болды. Іс-шара аясында қонақтарға отбасы тәрбиесі мен отбасылық жетістіктеріне байланысты түрлі сұрақтар қойылып, олар өз отбасыларының қызықты әрі ерекше оқиғаларымен, керемет естеліктерімен бөлісті.

Кездесу кеші барысында қонақтар қатысушы көрермендермен бірге қызықты ойындар ойнады. Сондай-ақ, орталығымыздың дарынды оқушысы Айару Кежебай анасымен бірге кеш қонақтарына арнап «Ана» әнін орындап, жиналған қауымның жүрегінен орын ала білді. Осылайша, кеш сәні мен мазмұны үйлесім тауып, әсерлі аяқталды.

Әр отбасы – қоғамның айнасы. Отбасы – әрбіріміз үшін қадірлі ұғым. Дегенмен, шаңырақтың беріктігі – үлкендердің үлгі-өнегесіне, өзара сыйластығы мен қамқорлығына байланысты. Бақытты отбасы – ел болашағының алтын діңгегі. Сондықтан да, осылайша ұлттық құндылықтарымызды дәріптейтін мерейлі, үлгілі отбасылардың қатары арта берсін дегім келеді.

Инабат ЖӘМЕЛОВА,
Қосымша білім беру педагогі,
Арқалық қаласы