Отбасы – ұлт тірегі

Жыл сайын қыркүйек айының екінші жексенбісінде елімізде аталып өтетін Отбасы күні – ұрпақ тәрбиесіндегі ата-ананың рөлін арттырып, ұлттық құндылықтарды дәріптеуге арналған маңызды мерекелердің бірі.

Осы атаулы күнге орай, Арқалық қаласының қосымша білім беру орталығы мен қалалық №2 әмбебап-ғылыми кітапхананың оқу залы бөлімі бірлесіп, «Отбасы – ұлт тірегі» атты кездесу кешін ұйымдастырды. Тағылымды іс-шараға ұлттық тәрбиенің өзегін берік ұстанған өнегелі Кәдірхановтар отбасы мен Н.Құлжанова атындағы Торғай гуманитарлық колледжінің белсенді студенттері қатысты.
Кеш барысында отбасының қоғамдағы орны мен бала тәрбиесіндегі жауапкершілік сынды өзекті тақырыптар қозғалды. Отбасылық құндылықтарды сақтап, ұрпаққа үлгі болып жүрген азаматтар өз тәжірибелерімен бөлісіп, жастарға өмірлік бағыт-бағдар беретін ақыл-кеңестерін айтты. Өнегелі кеш барысында ата-ана тақырыбында жазылған жүрекжарды өлеңдер оқылып, әуезді әндер шырқалды.
Іс-шарада білім бөлімінің әдіскері Н.Сәлімжанқызы, кітапхана басшысы С.Ахметқызы және қосымша білім беру орталығы басшысының м.а. Л.Әбдіғалиқызы отбасылық тәрбиенің қоғам іргетасын қалаудағы рөліне ерекше тоқталды. Кеш соңында қосымша білім беру орталығы жанындағы «Жанұя» клубының жетекшісі З.Б. Демесинова қатысушылармен бірге отбасылық қарым-қатынасты нығайтуға бағытталған тренинг жүргізіп, іс-шараны қорытындылады.

Инабат ЖӘМЕЛОВА,
Қосымша білім беру орталығының педагогі,
Арқалық қаласы