Сарқылмас білімнің сандығы

Адамгершілік құндылықтар жүйесін қалыптастырудың бірден-бір жолы – кітап оқу. Федоров ауданындағы Ыбырай Алтынсарин атындағы жалпы білім беретін мектебінің 4-сынып оқушылары аудандық балалар кітапханасына барды.

Елбасының «Болашаққа бағдар: рухани жаңғыру» бағдарламасының «Тұлғалық даму» бөлімін және «Оқуға құштар мектеп» жобасын жүзеге асыру бағытындағы танымдық сапар өскелең ұрпақтың бойында кітап оқу құзыреттілігін қалыптастыру мақсатын көздеді. Оқушылар кітапханадан өздеріне қызықты тақырыпта мәлімет алып, сүйікті ертегі кітаптарын оқыды. Кітапхана қызметкерлері байқаулар ұйымдастырып, оқушылардың қызығушылықтарын арттыра түсті. Білім алушылар да әңгіме барысында білетіндерін белсенді түрде ортаға салып, талқылауға ат салысты.

Кітап – адам баласының сан ғасырлық ақыл-ойының жемісі, тарихы мен тағылымының алтын сандығы. Ұрпақтан-ұрпаққа жалғасып келе жатқан рухани байлық. Кітапты таңдап, талғап оқи білу, оны түсіну мен түйсіну, алған әсерді өмір қажетіне жарата білу – әрбір адамның білігі мен білімін, пайымы мен парасатын айқындайтын алғышарттардың бірі. «Артық білім кітапта, ерінбей оқып көруге», – деп ақын Абай Құнанбаев жырлағандай, ерінбей білім алуға асығайық. Білімнің сарқылмас сандығын кітаптан ғана таба алатынымызды ұмытпайық.

Нұршаш ЗИЯ,
Ы.Алтынсарин атындағы
ЖББМ бастауыш
сыныптар мұғалімі,
Федоров ауданы