Шебердің қолы көпке ортақ

Арқалық қаласындағы Қосымша білім беру орталығының ұйымдастыруымен қала мектептері арасында «Шебердің қолы ортақ» отбасылық шығармашылық қолөнер байқауы ұйымдастырылды.

ҚР Оқу-ағарту министрлігінің «Төрт тоқсан – төрт өнер» ұлттық мәдени-ағартушылық жобасының «Ұлттық өнер» бөліміне арналған іс-шараға ата-аналар 1 баласымен қатысып, еркін тақырыпта фетр матасынан 1 қолөнер бұйымын 40 минут ішінде жасаулары қажет болды. Қатысушылардың өнеріне Білім бөлімінің әдіскері Назерке Мұханбетқалиева мен Мектепаралық оқу-өндірістік комбинатының қолөнер бөлімінің педагогі Рыскүл Едресова төрелік етті.
Қолөнер – халқымыздың қасиеттімен ұрпақтан-ұрпаққа ауысып, тамырын тереңге жайып келе жатқан мұрасы. Қазақтың қолөнері, зергерлік өнері өзінің төлтума бітім қасиетімен, көркемдік мән-мағынасымен шын мәніндегі халқымыздың ғасырлар тағылымынан өткен асыл қазынасы. Осы асыл қазынаны жоғалтпай, әрмен қарай дамыту – жас ұрпақтың міндеті. «Бүгінгі кәсібің – ертеңгі нәсібің» деп бекер айтылмаса керек. Отбасылық қолөнер байқауында барынша жақсы дайындалып келген ата-аналар балаларымен бірлесе жеңісеке жету үшін барын салды.
Нәтижесінде №2 ЖББ мектебі атынан қатысқан Исламовтар отбасы І орынға ие болды. ІІ орынды Абай Құнанбаев атындағы мектеп-гимназия атынан қатысқан Киекбаевтар отбасы мен Ахмет Байтұрсынов атындағы бастауыш гимназиясының атынан қатысқан Қапсалықовтар отбасы теңдей бөлісті. Ал, жүлделі ІІІ орынды Ш.Уәлиханов атындағы №1 ЖББ мектебінен қатысқан Абдумаликовтар отбасы, Б.Майлин атындағы №3 ЖББ мектебінен қатысқан Мұхтаровтар отбасы және №10 ЖББ мектебінің атынан бақ сынаған Майоровтар отбасы иеленді. Жеңімпаз отбасылар орталығымыздың атынан мадақтамалармен және естелік сыйлықтарымен марапатталды.

Инабат ЖӘМЕЛОВА,
Қосымша білім беру орталығы, «Жанұя»
клубының жетекшісі,
Арқалық қаласы