Шуағын төккен Наурыз

Выпуск - №11 (458) : 22.03.2021

329

Қостанай қаласындағы «Южный» кітапхана-филиалында Ұлыстың ұлы күні – Наурыз мейрамы қарсаңында «Шуақты Наурыз!» атты тақырыпта ғаламтор қолданушыларға арналған онлайн-мереке өткізілді.

Қашықтан өткізілген меркелік іс-шара желі қолданушыларына ұлттық салт-дәстүр, әдет-ғұрып жайында қарапайым түсінік беру, ата-бабаларымыздың кейінгі ұрпаққа мирас еткен асыл мұрасын қадірлеп, қастерлеуге, қасиетін түсінуге баулу, сондай-ақ ұлттық дәстүрдің ерекшеліктерімен таныстыру мақсатын көздеді. Ең алдымен, кітапхана қызметкері Наурыз мейрамының тарихына тоқталып, игіліктің, жаңару мен жақсылықтың бастауы саналатын бұл мерекеге қазір үлкен мән беріліп жатқанын атап өтті.
Ұлыстың ұлы күні кем дегенде жеті түрлі дәмнен тұратын наурыз тойының өзіне тән үлкен ырым асы – «Наурыз көже» дайындалады. Әр шаңырақта дастарқан жайылып, бір-біріне бата-тілектер айтылады. Бұл күні араздасып жүрген адамдар татуласып, төс қағыстырады. Артынша мереке қазақтың ұлттық ойындарымен, салт-дәстүрлермен жалғасқан. Дегенмен еліміздегі ахуалға байланысты биыл көптеген іс-шаралар онлайн форматта өткізілуде.
Биыл Үкімет тарапынан бекітілген тұжырымдамаға сәйкес, Наурыз мейрамы айдың 14-і мен 23-і аралығында, яғни 10 күн қатарынан атап өтіледі. Ұлыстың ұлы күні қарсаңында арнайы бағдарламалардан бөлек, кітап көрмесі де қойылды. Балаларға арналған қызықты ертегілер және «Сен білесін бе?» атты тарихи-этнографиялық кітаптар топтамасы: «Наурыз» «Киіз үй» «Ұлттық киімдер» «Ұлттық тағамдар» және тағы басқа да қызықты кітаптар бар. Еліміздің тарихын, халықтың бата-тілектерін, салт-дәстүрі мен әдет-ғұрпы жайлы білгіңіз келсе біздің кітапханаға келіңіздер!

Шолпан ӘБІЛТАЕВА,
«Южный» кітапхана-
филиалының қызметкері,
Қостанай қаласы