Шығармашылық және махаббатпен

«Өзін-өзі тану» адамгершілік-рухани білім беру бағдарламасының маңыздылығын және сырлы әлемге толы дүние екендігін таныту мақсатында №10 орта мектепте махаббат пен шығармашылыққа негізделген онкүндік өтті.

Өткенге көз жүгіртсек, Сара Назарбаеваның бастамасымен 2010 жылы қыркүйектің бірінен бастап өзін-өзі тану пәні енгізілді. Аталған пән арқылы адам өзінің жылуын басқаларға сыйлап, адамгершілік құндылықтарды дамытып қана қоймай, ішкі жан дүниесін байытуға ықпал етеді.



Мектебіміздің кітапхана меңгерушісі «Мейірім төгетін ана» атты көрме ұйымдастырып, Сара Алпысқызының өмірі мен шығармашылығы жайлы қысқаша таныстырып өтті. Өзін-өзі тану мұғалімдері рухани-адамгершілік білім беру бағдарламасының авторы туралы стендтер әзірлеп, сынып жетекшілер «Жүрегіңмен тыңда» атты мектепшілік ашық сабақтарын өткізді. Оқушыларға адамгершілік, мейірімділік, сүйіспеншілік, достық пен бейбітшілік жайлы түсініктер берілді.
Оқушыларымыз тәрбие сағаттарында мейірімділіктің – ең қасиетті сезім екенін, отбасындағы бір-біріне деген сыйластық пен қамқорлықтың маңызын түсіне білді. Мұғалім әрқашан оқушылардың ерекшеліктерін ескере отырып, олардың «тұлға» екендігін түсіндіре отырып, мейірімді болуға бағыттайды. Оқушылар «Жүрегім тұнған махаббат» тақырыбына эссе жазып, «Анама сыйлық» тақырыбында аналарына деген ыстық ықыластарын қолөнерлері арқылы білдірді. Ал артынша ұйымдастырылған «Жомарт жүрек» фотосуреттер байқауына бастауыш сынып оқушылары белсене қатысты.

Көркемдік жағы да назардан тыс қалмады. «Өзін-өзі тану» рухани-адамгершілік білім беру бағдарламасының авторы Сара Назарбаева жайында бейнефильмдер көрсетілді. Өзін-өзі тану пәні қаншалықты маңызды екендігін, жеке тұлғаның өзін-өзі танып қана қоймай, рухани байып, әрбір тұлғаның өзгеруіне мүмкіндік беретіндігі жан-жақты ұғындырылды. Жалпы өзі-өзі тану пәні баланың өзін жақсы көруге, қасында жүрген жандарды сыйлауға насихаттайды. Оқушылар іс-шараларға мейірімділікпен ат салысып, айналасындағы адамдарға, қоршаған ортаға, құстарға деген сыйластық жайлы түсініктерін кеңейтті.

Әсел ЖАНСУГУРОВА,
Гүлнар БЕКБУСИНОВА,
№10 ОМ жантанушылары,
Қостанай қаласы