Тараз төріндегі жеңіс

Жуырда Тараз қаласында республикалық футбол турнирі өтті. Онда Қостанай өңірінің намысын қорғаған Марат Нұрғалиев атындағы футбол мектебінің жас спортшылары талпынысы мен табандылығын көрсетіп, зор жетістікке қол жеткізді.
Еліміздің оңтүстік өңірлері – Шымкент, Ақтау, Қызылорда және Тараз қалаларынан 12 үздік команда қатысқан турнир жоғары деңгейдегі бәсекелестік жағдайында өтіп, жас спортшылар шеберліктерін көрсете білді. Қостанайдан барған Марат Нұрғалиев атындағы футбол мектебінің екі командасы да жарыстың финалдық кезеңіне жолдама алып, аймақ футболының әлеуетін дәлелдеді.

Бірінші команда чемпион атанып, алтын медальға ие болса, екінші команда күміс жүлдені қанжығалады. Бұл – тек бір мектептің ғана емес, тұтас өңірдің абыройын асқақтатқан тамаша жетістік. Жарыс барысында бірқатар жас футболшылар ерекше көзге түсіп, жүлделі орындар мен арнайы марапаттарға ие болды. Атап айтар болсақ: Дени Мирзов – турнирдің үздік ойыншысы, Бекзат Бейбитхан – үздік шабуылшы, ал Инсар Алтынсаров – командадағы ең үздік бомбардир атанды.
Абай атындағы жалпы білім беретін мектептің 5-сынып оқушысы да жарыста өңірлік команда құрамында өнер көрсетіп, шеберлігі мен табандылығын дәлелдеді. Сынып жетекшісі ретінде мен жас шәкіртімнің спорттық рухы мен ынта-жігеріне куәмін және оның жетістігімен шын жүректен мақтанамын. Жас ұрпақтың осындай додада топ жарып, еліміздің абыройын асқақтатуы – барша ұстаздар мен ата-аналар үшін үлкен қуаныш.

Айжан МОЛДАХМЕТОВА,
Абай атындағы жалпы
білім беретін мектептің
қазақ тілі мен әдебиеті пәнінің мұғалімі,
Қостанай қаласы