«Үйірме – өнер бастауы»

Осындай тақырыпта Ш.Уәлиханов атындағы №1 ЖББ мектебінде оқушыларға қолөнер бұйымдары насихатталды. Ұлттық қолөнер бұйымдары арқылы халқымыздың дәстүрі мен тұрмыс-тіршілігін танып білеміз.

Бүгінгі ғылым мен техниканың дамыған кезінде ұлттық қолөнеріміз жас ұрпақ үшін беймәлім дүние болып барады. Сол себепті ұмытылып бара жатқан қолөнерімізді қолға алып, жас ұрпаққа таныстыра отырып, халқымыздың қолөнерін қастерлеуге, үлгі тұтуға насихаттау – басты мақсатымыз. Үштік одақ – мектеп ұжымы, ата-ана және оқушылар – белсене қатысқан бұл қолөнер көрмесінде ата-аналар оқушыларға халқымыздың ежелден келе жатқан қолөнер бұйымдарын таныстырып, олардың жасалу жолдарын көрсетті.

Қазақ халқының қолөнері халықтың тұрмысында жиі қолданылған. Кесте тігу, кілем тоқу, құрақ құрау, киіз басу, сырмақ сыру, тоқыма тоқу тәрізді сан алуан қолөнер түрлері қазіргі уақытта сирек қолданылып, тіпті ұмытыла бастады деуге болады. Ұршық иіру, түбіт түту, құрақ құрау өнерлерімен қатар заманауи моншақ пен бисерден жасайтын бұйымдардың жасалу жолдарымен оқушылар асқан қызығушылықпен танысты.

Түбіттен жасалған бұйымдарын таныстырып, түбіт түткен 83 жастағы әжейдің өнерінен оқушылар жақсы әсер алды. Бүгінде сирек кездесетін түбіттен тоқылған қолғап, шұлықтарды оқушыларға таныстырған әжеге шебер-сабақты ұйымдастырушы мектеп директорының тәрбие ісі жөніндегі орынбасары Жулдызай Кокышева мектеп ұжымы атынан алғыс айтты.

Жұлдыз МҰХАНБЕТҚАЛИ,
Ш.Уәлиханов атындағы
№1 ЖББМ бастауыш
сынып мұғалімі,
Арқалық қаласы