Жастар адалдықты суреттеді

Арқалық қаласындағы Қосымша білім беру орталығында оқушылардың бойында адалдық, әділдік, жауапкершілік сияқты адамгершілік құндылықтарды қалыптастыру мақсатында «Адалдық – менің таңдауым» тақырыбында сурет байқауы өтті.

Байқауға қаламыздың мектептерінен 5 пен 8-сыныптардан бір-бір баладан қатысып, ойларын сурет арқылы жеткізе білді. Олардың суреттерінде адал еңбек етіп жүрген адамдар, достық пен шындық, әділ шешім қабылдау сәттері және Отанға деген адалдық көрініс тапты. Әрбір жұмыс баланың адалдықты қалай түсінетінін және оны өмірде қалай бағалайтынын айқын көрсетті.
Нәтижесінде үздік жұмыстар анықталып, жеңімпаздарға Орталығымыздың атынан мадақтама қағаздары мен сыйлықтар табысталды. Дегенмен бұл байқаудағы ең басты жеңіс – жүлде емес, жастардың «адалдық» сөзінің маңызын терең түсінуі болды. Осындай іс-шаралар оқушыларды дұрыс таңдау жасауға, әрдайым шыншыл әрі әділ болуға тәрбиелейді. Адалдық – адам өміріндегі ең асыл қасиеттердің бірі. Сондықтан адал болу – әрқайсымыздың саналы таңдауымыз.

Бекзат ҚАБУСАҒИТ,
Қосымша білім беру
орталығының педагогі,
Арқалық қаласы