Жүректен шыққан өнер

Арқалық қаласындағы қосымша білім беру орталығының «Қуыршақ және театр» үйірмесінің ұйымдастыруымен А.Құнанбаевтың 180 жылдығына орай «Абай мұрасы – мәңгілік» атты сахналық қойылым байқауы өтті.

Абай Құнанбайұлы – қазақ поэзиясының биік шыңы, құдіретті ақыны. Оның жүрек шерімен жазған туындылары – тағылымы терең, мәңгілік қымбат қазына. Абайды жалғыз қазақ халқының емес, бүкіл адамзаттың ұлы десек артық болмас. Әлем халқы бас иген дара тұлғаны қай қырынан да ұлықтау – біздің елдік және халықтық парызымыз.
Мән-маңызы зор байқауға қала бойынша 5 мектеп қатысты. Нәтижесінде «Шығармашылық шабыт» номинациясымен Т.Әубәкіров атындағы негізгі орта мектеп, ал «Үздік актёрлік бейне» аталымымен Кейкі батыр атындағы №4 жалпы білім беретін мектеп марапатталды. ІІІ орын – Әлихан Бөкейхан атындағы жалпы білім беретін мектепке, ІІ орын – А.Байтұрсынов атындағы бастауыш гимназияға, жүлделі І орын – А.Құнанбаев атындағы мектеп-гимназиясы оқушыларына бұйырды. Жеңімпаздар орталықтың мадақтамалары мен естелік сыйлықтарымен марапатталды.
Қай ғасырда өмір сүрсе де, Абай атамыздың шығармалары мен қара сөздері, өсиетке толы өнегелі өмірі – бүгінде де, болашақта да маңызы мен құндылығын жоғалтпақ емес.

Жазира ТОНАШИНА,
Қосымша білім беру
орталығының педагогі,
Арқалық қаласы