Абайды бүгінгімен жалғаған шара

Елімізде Абай Құнанбайұлының 175 жылдық мерейтойына орай түрлі шаралар бастау алды. Рудный политехникалық колледжінде де қазақ тілі мен әдебиеті оқытушыларының ұйымдастырумен «Абай оқулығы» сайысы өтті.

Сара Нартаева және менің жетекшілігіммен ұйымдастырылған сайыстың мақсаты – халқымыздың дана ақыны, ғұлама ойшылы, сазгер Абай Құнанбайұлының өлеңдері мен әндерінің таралуын насихаттау, бүгінгі ұрпақтарының Абай мұрасына қызығушылығын арттыру, оны оқып-білуге, тани түсуге ынталандыру. Кітапхана меңгерушісі Надежда Башкирова мен кітапханашы Сәуле Италмасова Абайдың портреті, эпиграф жазылған плакаттар, кітап көрмесі, слайд, бейнероликтер жасап, жас ұрпақтарды адамгершілікке, патриоттық тәрбиеге шақырды. Колледж білім алушылары Абай атамыздың өмір жолымен танысып, өлеңдері мен нақыл сөздеріне тоқталып, үш тілде өнерлерін көрсетті.

Еліміздің түпкір-түпкірінде 2007 жылдан бастап қолға алынған «Бір ел – бір кітап» акциясына Рудный политехникалық колледжінің кітапхана қызметкерлері және оқытушылары мен білім алушылары да жыл сайын үлестерін қосуда. 2020 жылы Абайдың 175 жылдық мерейтойына орай «Бір ел – бір кітап» республикалық акциясы аясында М.Әуезовтың «Абай жолы» роман-эпопеясы, шығыс ғұламасы Әбу Насыр әл-Фарабидің 1150 жылдық мерейтойына орай Әнуар Әлімжановтың «Ұстаздың оралуы» романы таңдалды. Аталған колледжде «Бір ел – бір кітап» республикалық акциясының негізінде қыркүйектің 25-і мен қазанның 5-і аралығында «Времен связующая нить» эссе байқауы өткізілді.

Байқаудың мақсаты – қазақ әдебиетін насихаттау, қоғамның кітап оқуға деген қызығушылығын арттыру, Қазақстанның әдеби мұрасын зерттеуге деген қызығушылықты дамыту. Өскелең ұрпақтың зияткерлік-рухани дамуы, ана тілі мен мәдениетіне ұқыпты қарау, жастарға адамгершілік, патриоттық тәрбие беру жағы да көзделді. Байқауға 1-курс білім алушылары ат салысып, білімдерін көрсетіп, жүлделі орындарға ие болды. Нәтижесінде 1-орынға М.Мақсатов, 2-орынға Е.Жұмабеков, А.Парахатов ие болса, 3-орынды С.Қаратаева мен Д.Усенов қанжығасына байлап, мадақтамалармен марапатталды.

Колледжіміздің білім алушыларына жыл сайын осылайша байқауларға қатысып, биік шыңдардан көріне берулерін тілеймін. Рудный политехникалық колледжінің кітапханасы «Бір ел – бір кітап» акциясын қолдап, баршаңызды жоғарыда аты аталған кітаптарды оқуға шақырады.

Балкеш НҰРЖАНОВА,
Рудный политехникалық
колледжінің қазақ тілі мен
әдебиеті мұғалімі