Ардагерлерімізді ардақтайық

Әрбір ата-ана баласын үлкендерді сыйлауға тәрбиелейді. Арқалық қаласындағы Н.Құлжанова атындағы Торғай гуманитарлық колледжінің Жастар ісі жөніндегі комитетінің ұйымдастыруымен «Ардагерлерді ардақтайық» акциясы өтті.

«Қарты бар үйдің қазынасы бар», – деп дана халқымыз айтқандай, үйінде қариясы бар жанұя – шынында да, қазыналы, берекелі. ДМ-12 тобының ерікті жастары шарапаты мол шараға өз үлестерін қосып, Новый кентінде Павлова 66 мекенжайында тұратын жалғызбасты зейнеткер Кимбат Бикеева апамыздың ауласының қарын тазалап, батасын алды.

Үлкенді сыйлау, оларға құрмет көрсету – ұрпақтан ұрпаққа жалғасып келе жатқан қастерлі салтымыз. Ардагерлеріміздің өмірлік тәжірибелері мен ақыл-кеңестері, тәлім-тағылымдарының біз үшін қашанда орны бөлек. Талай жасты тәрбиелеп, ізбасарларын өсірді. Бұл күндері еңбектің зейнетін көріп отырған шақта да жастарға игілік пен ізгіліктің, пайым-парасаттың үлгісін танытудан жалыққан емес.

«Төріңнен қарт кетпесін» деп тілеген халқымыз. Жасы үлкенге құрмет көрсету, қарттың бүгілген беліне сүйеу болу – абыройлы борышымыз. Жарық дүниеге әкеліп, тіршілік атаулыға нәрін берген ата-ананың алдындағы парызымыз өлшеусіз. Сондықтан, ақсақалдарымыз бен ақ жаулықты апаларымыздың қадіріне жетіп, құрметтеп өтейік дегім келеді.

Ниязбек ОРАЗОВ,
Н.Құлжанова атындағы
Торғай гуманитарлық колледжі
Жастар ісі жөніндегі
комитетінің төрағасы,
Арқалық қаласы