Білім мен тәжірибе ұштасқанда

Қазақстанда өндірістік және азаматтық құрылыс саласы жетекші орында екені бұрыннан белгілі. Ал осы саладығы атқарылып жатқан жұмыстар мен ауқымды іс-шараларда Қостанай құрылыс колледжінің үлесі қандай?

Қала құрылысына ат салысып жатқан колледж студенттерінің кәсіби деңгейі жыл санап артуда. Бұған себеп: колледждің материалдық-техникалық базасы жыл санап күшейіп келеді. Бұл бағыттағы атқарылып жатқан (бекітілген бағдарламаға сәйкес) жұмыстарға KNAUF компаниясы көмек қолын созып келеді. Қостанай құрылыс колледжі аталмыш компанияның ресурстық оқу орталығы болып бекітілген. Мұндай орталықтар Қазақстанда саусақпен санарлық. Соның нәтижесінде әрі «Жас маман» бағдарламасы бойынша колледжге шамамен 200 млн теңгеден асып-жығылатын сомаға қажетті құрал-жабдықтар жеткізілген болатын. Міне, осылардың арқасында студенттерді оқытып-үйретудің тиімді тәсілдерін меңгеру мүмкін болып отыр.

KNAUF компаниясы Қапшағай қаласында орналасқан. Ол жерде алып заводтар жұмыс өнімдері: құрғақ құрылыс қоспалары, (әр түрлі әрлеу және босқа мақсаттарда қолданылатын) гипсокартон, металл профилдері қазіргі нарықта үлкен сұранысқа ие. Бұл мекеменің өз оқыту орталығы бар. Онда жыл сайын Қазақстанның түкпір-түкпірінен мұғалімдер мен өндірістік оқыту шеберлерінен жасақталған тәлімгерлер оқу орнының кезекті жоспары бойынша дәрістер алып тұрады және қатысушы әрбір өкіл өз өңірлерінде озық тәжірибелерді қолданысқа енгізіп отырады. Қазіргі уақытта құрылыста, әсіресе тұрғын үй құрылысын «құрғақ» әдіспен жүргізудің өзектілігі артып келеді. Бұған құрылыс барысында бөлмеаралық қабырғалар орнату, еден орнату, бөлме төбелерін әрлеу және оларға архитектуралық рең кіргізу секілді жұмыстарды жүргізу жатады.

Колледжімізде WorldSkills Қазақстан чемпионатына дайындық сайыстың екі түрі бойынша жүргізілуде. Атап айтсақ, «құрғақ құрылыс және сылақ жұмыстары» мен «тас қалаушы» біліктілігіне облыстық бас сарапшы, Қостанай құрылыс колледжінің өндірістік оқыту шебері А.В. Сошкин және сарапшы, өндірістік оқыту шебері Бейсекеевтің дайындап жатқан студенттері жуырда өткізілген колледжішілік сайыста жоғары нәтиже көрсетті. Олар: 371 СЗЭС тобының студенттері Александр Шевченко мен Сергей Яныгин. Шеберлердің қажырлы еңбегінің және қатысушылардың талаптануларының арқасында әлі талай чемпионаттарда біздің Қостанай құрылыс колледжі студенттері үлкен жетістіктерге жетері сөзсіз.

Қайрат КАРШАЛОВ,
Қостанай құрылыс
колледжінің арнайы
пәндер оқытушысы