Болашаққа жол көрсеткен бағдаршам

Жақында қаламыздағы №19 жалпы білім беретін мектептің түлектері А.Байтұрсынұлы атындағы Қостанай өңірлік университетінің гуманитарлық-әлеуметтік факультетінде қонақта болды.

Оларға гуманитарлық-әлеуметтік факультет деканы Әлібек Нұрмағамбетұлы Табулденов мол мағлұмат беріп, факультеттің тыныс-тіршілігі, оқу ордасының мүмкіндіктері мен болашақ кәсіби бағыттарына тоқталып, әрбір мамандықтың ерекшелігі мен артықшылықтарын атап өтті. Әрине, студенттерге берілетін білімнің сапасы, тәжірибелік мүмкіндіктер, сондай-ақ түлектердің еңбек нарығындағы сұранысы туралы да сөз қозғалды. Өз кезегінде, түлектердің бірі Артур Змеев іс-шараның маңыздылығын ерекше атап өтті:
– Аталмыш іс-шара маған қатты ұнады. Біз оқытушылармен, факультет деканымен таныстық, университеттегі мамандықтар жайлы және де ҰБТ-дағы қажетті пәндер мен грантқа түсу балдары турады мәлімет алдық. Бұл – болашағымызға үлкен үлес қосады деп ойлаймын, – деді ол.

Қонақтар білім ордасының шығармашылық алаңы саналатын медиа-студияға да бас сұғып, арнайы экскурсия арқылы журналистика әлеміне алғашқы қадамын жасады. Олар студиядағы заманауи техникалармен танысып, камера алдында еркін сөйлеу машығын байқап та көрді. Бұл тәжірибе оқушыларға ерекше әсер қалдырып, шығармашылық ортаға деген қызығушылығын да оятқаны сөзсіз.
– Экскурсия маған ерекше әсер етті. Қойғың келген сұрақтарға жауапты алдын ала беріп отырады. Ақпарат өте көп, оны әлеуметтік желіден немесе сайттан таба алмауың мүмкін. Барлығы өте сыпайы, қонақжай. Атмосферасы жайлы, осы жерде оқығың келіп кетеді, – дейді келген оқушылардың бірі Алена Цикотская.
Жалпы, аталмыш іс-шара түлектердің жоғары білімге деген ынтасын арттырып қоймай, болашақтарына сеніммен қадам басуға шабыттандырды. Университеттің ашық есік күндері аясындағы мұндай кездесулер жастарға кәсіби бағыт-бағдар беріп, өмірлік маңызды шешім қабылдауға жол ашатынына сенім бар.

Аружан АНИСОВА,
ҚӨУ 3-курс студенті,
Суретті түсірген:
Айгерім БАХИТБЕК