Даналықтың дәнін сепкен

Арқалық политехникалық колледжінде қазақтың ұлы ақыны, ағартушысы Абай Құнанбаевтың 180 жылдық мерейтойына орай «Даналықтың дәнін сепкен ұлы ойшыл» атты шығармашылық байқау ұйымдастырылды.

Абайдың әдеби мұрасымен таныстыру, ақын шығармаларындағы адамгершілік, білім, еңбек, рухани құндылықтарды насихаттау, жастардың шығармашылық қабілетін дамытуды көздеген байқау төрт кезең бойынша өтті. Алғашқы «Өлең сөздің патшасы» кезеңінде қатысушылар Абай өлеңдерін жатқа айтса, екінші – «Қара сөздің қазынасы» кезеңінде қара сөздерден үзінділерді танып, мазмұнын жеткізуге тырысты. «Әуезді әуен» – Абай әндерін орындауға негізделсе, соңғы «Жидебай жолы» – ақынның өмірі мен шығармашылығы туралы сұрақтардан тұрды.
Байқауға 1-курс білім алушылары белсенді қатысып, өздерінің дайындығын, шығармашылық мүмкіндіктерін көрсете білді. Тағылымға толы іс-шара қатысушыларға рухани әсер сыйлады. Үздік нәтиже көрсеткен студенттерге мадақтамалар табысталды. Абай атамыз: «Ғылым таппай мақтанба», – деп, адам болмысының кемелденуін басты мұрат еткен еді. Бұл бас қосу сол ұлы өсиеттің жалғасы болып, жастардың білімге, өнерге және ізгілікке деген талпынысының дәлелі болды.

Самал ЖИЕНБАЕВА,
Арқалық политехникалық
колледжінің қазақ тілі
мен әдебиеті пәнінің
оқытушысы