Дипломды 108 жас маман

Қостанай жоғары политехникалық колледжінде салтанатты шара – мамандығының қыр-сырын меңгеріп шыққан 2022 жылғы түлектерге диплом табыстау рәсімі өтті. Биыл білім ордасынан 108 маман даярланып шықты.

Оның ішінде наубайхана, макарон және кондитерлік өнімдер өндірісінің технологтары; элеватор, ұн тарту, жарма өндірісінің технологтары мен механиктері бар. Колледждің педагогикалық ұжымы түлектерін мақтан тұтады. Колледж қабырғасында өткізген жылдарда студенттер тамаша оқу жетістіктерін көрсетті, олимпиадаларға, сайыстарға, спорттық жарыстарға қатысып, шығармашылық қабілеттерін де көрсетті.

Колледжіміздің 15 студенті ерекше үлгідегі дипломға ие болды. Түлектерге диплом тапсыру рәсіміне колледждің әлеуметтік серіктестерінің өкілдері: «Баян Сұлу» АҚ кадр бөлімінің басшысы А.Альмухаметова, «Kazingredients» ЖШС технолог-кеңесшісі Л.Харина, «AgromashHoldingKZ» АҚ кадрлық жұмыс жөніндегі маманы А.Әубакирова, «Bloomiko» директоры П.Зиннер қатысты. Өз сөзінде Полина Зиннер: «Сіздердің Тәуелсіз Қазақстанның дамуы мен гүлденуіне лайықты үлес қосатындарыңызға сенімдімін. Ол үшін аянбай еңбек етіп, әрқашан алға қойған мақсаттарға ұмтылу керек», – деп атап өтті.

Шара барысында колледж әкімшілігі, ұстаздар, студенттердің ата-аналары атынан құттықтаулар мен қоштасу сөздері айтылды. «Әнші жүректер» вокалдық тобы мен «Мирас» би студиясы көрермендерге заманауи шығармаларын тарту етті. Түлектер үшін колледжді бітіріп, диплом алу – өмір жолындағы бір белес. Білім ордамыздың студенттері, ұстаздары мен жалпы колледж ұжымы түлектерімізге армандарының орындалуын және болашағына ақ жол тіледі.

Людмила ДЮСЕКЕЕВА,
Қостанай жоғары политехникалық
колледжі директорының
ОТЖ орынбасары