Ерікті болу – өз еркің

Жақсылық жасау, жығылғанға сүйеу, жылағанға тіреу болу – кез келген адамның қолынан келетін іс. Тіпті бұл қазақ халқының өмір заңдылығы мен күнделікті тұрмыс-тіршілігіне сіңіп кеткен дүние десек те болғандай.

Мұны біз алыстан сұлбасы көрінген қарияның жүгін көтеруге асығатын баладан немесе жасы кішіге ізет білдіріп, үлкенге құрмет көрсетіп жүрген жастардан аңғара аламыз. Қазіргі таңда жақсылық жасаудың осынау үлгісі мемлекеттік маңызға ие болып, оған үлкен мән берілуде. Хәкім Абайдың он төртінші қара сөзінде: «Нағыз жүрек ісі – рақымдылық, мейірбандық және әртүрлі істе адам баласының бәрін өзіне тартып, бауырым деп, өзіңе ойлағандай болса игі еді», – делінген.

Нәзипа Құлжанова атындағы Торғай гуманитарлық колледжінде сондай жақсылық жасауға асық жастардан құралған Колледж еріктілерінің жаңа құрамасының алғашқы танысу отырысы өтті. Түсіндірме отырыс барысында ерікті ұғымы жайлы, еріктілер қандай жұмыс атқарып, не істейтіні жайлы толық мәлімет берілді. Жастар ісі жөніндегі комитетінің төрағасы ретінде сөз сөйлеп, білім алушыларды жан-жақты болуға шақырдым. Еріктілер клубның жетекшісі Индира Қалыбай әр түрлі тренинг көрсетіп, «жұмыла көтерген жүк жеңіл» деген ұстанымды ұран етіп, еріктілерімізді белсенді болуға шақырды.

Артынша слайдтан еріктілер тобының жұмысы көрсетіліп, толық түсіндірілді және алдыңғы жылдағы волонтерлардың атқарған еңбектерін таныстырып өтті. Жақсылық жасау – жүрегі жылы әрбір адамның қолынан келеді. Біз жақсылық пен қайырымдылықты жасаған сайын бақытты қоғамның босағасын бекітеміз. Сондықтан жақсылық жасауға асығайық, жас достар!

Ниязбек ОРАЗОВ,
Н.Құлжанова атындағы
Торғай гуманитарлық колледжі
Жастар ісі жөніндегі
комитетінің төрағасы,
Арқалық қаласы