Ерлік сабағы – тарихқа тағылым

Ұрпақ тәрбиесінде ел қорғаған ерлердің есімі мен олардың ерлік істерін дәріптеудің маңызы айрықша. Осы тұрғыда білім ордаларында өткізілетін «Ерлік сабақтарының» орны бөлек. Өйткені тарихтың әрбір парағы батырлардың өнегелі өмір жолымен өрілген.

«Ерлік сабағында» Ұлы Отан соғысы жылдарындағы халқымыздың жанқиярлық ерліктері, ел тәуелсіздігі жолында күрескен батырлардың өмірі кеңінен баяндалады. Қаншама боздақ от пен оқтың ортасында жүріп, Отанын қорғап қалды. Олардың есімдері халықтың жүрегінде мәңгіге сақталып, жас ұрпақтың жадында жаңғыра бермек. 2025 жылғы «Күзгі шақыру науқаның» тиімді дайындау және өткізу мақсатында Н.Құлжанова атындағы Торғай гуманитарлық колледжінің алғашқы әскери және технологиялық дайындық пәнінің мұғалімі ретінде өнегеге толы «Ерлік сабағын» ұйымдастырдым.

Аталған іс-шараға Арқалық қаласы қорғаныс істері жөніндегі бөлім бастығының міндетін атқарушы майор Нургалиев Дастан Турдахунович және Келісімшарт бойынша әскери қызметке қабылдау жөніндегі инспектор азаматтық персонал Бекбосынов Асылбек Болатович жастармен сұхбаттасу үшін арнайы шақырылды. «Ерлік сабағы» – өткенді еске алу ғана емес, қазіргі бейбіт өмірдің қадірін ұғындыруды да мақсат етеді. Тәуелсіз Қазақстанның айбынды армиясы, оның жауынгерлері – сол ерлік дәстүрінің заңды жалғасы. Бүгінгі жастар бабалардың ерлігін жалғап, елді дамытуға, мемлекетті қорғауға дайын болуы тиіс.

Ниязбек ОРАЗОВ,
Н.Құлжанова атындағы
Торғай гуманитарлық
колледжінің алғашқы
әскери және технологиялық
дайындық пәнінің
оқытушысы,
Арқалық қаласы