Кәсіптік білім беру онкүндігі

Жастарды еңбекке баулу және мамандықтарын дұрыс таңдауға бағыт беру мақсатында Қостанай педагогикалық колледжінде кәсіптік бағдар беру апталығы аясында онкүндік іс-шара өткізілді.

Саналы түрде таңдалған мамандық тұлғаның болашағына үлкен әсер етеді. Болашақтағы кәсіби мақсатына дұрыс бағыт алған оқушы бойындағы қабілетін шығармашылықпен дамыта білсе, сапалы маман ретінде қалыптасатыны белгілі.

Кәсіби бағдар беру онкүндігінің салтанатты ашылуы қазіргі жағдайға байланысты қашықтан ұйымдастырылды. Онкүндік шара аясында «Біздің колледжді таңда!» кәсіптік бағдар беру бағытындағы бейнебайқауы өткізілді. Оған колледжден 12 топтың студенттері белсенді қатысқанын айта кеткен ләзім. Шығармашылық сайысының нәтижесінде І орынға РТК-31 тобының студенттері мен кураторы Салтанат Доспанова ие болса, ІІ орынды У-41 тобының студенттері мен кураторы Лилия Юсова иеленді. Ал жүлделі ІІІ орын Т-31 және Ак-31 тобының студенттері мен кураторлары Алтынгүл Жармұхамбетова және Нұралы Арыстанға бұйырды.

Облыстық «Үздік кәсіби бағдар беруші» байқауына филология кафедрасының оқытушысы Татьяна Ткаченко қатысуда. Татьяна Евгеньевнаны қолдау мақсатында әлеуметтік желілерде ақпараттар жарияланды және оқытушылар мен студенттер қолдау көрсетті. Кәсіптік бағдар беру жұмысы бүгінде ең көп талқыланатын тақырып және жиі көтерілетін өзекті сұрақтардың қатарында. Онкүндіктің жабылуында 42 қатысушы, оның ішінде 33 студент және 9 оқытушы мақтау қағаздарымен марапатталды.

Ляззат СЕЙЛОВА,
Қостанай педагогикалық
колледжі қабылдау бөлімінің
жауапты хатшысы