«Кел, шәй ішейік» акциясы

Жыл сайын қайырымдылыққа негізделген игі істер қоғамда кең өріс алып келеді. Осы ортада жастардың белсенділік танытуы көңіл қуантады. Ы.Алтынсарин атындағы гимназия мектебі де жақсы істерден қалыс қалған емес, керісінше, ізгілік жолында ілгері басуда.

Жақында білім ордасының «Жас эколог» үйірмесінің ұйымдастыруымен «Кел, шәй ішейік» акциясы өтті. Іс-шара қаламыздың тазалығын сақтап, шаһарымыздың шырайын келтіргені үшін, «Тазарту – Арқалық» ЖШС қызметкерлеріне қолдау көрсету және тұрғындарға керемет көңіл-күй сыйлау және жастарға еңбек адамын бағалап, олардың жұмысына құрмет көрсету мақсатында ұйымдастырылды.

Акция барысында коммуналдық қызметкерлерге ыстық шай мен жаңа піскен бауырсақтар ұсынылды. Қыстың аязды күндерінде қала тазалығы мен тәртібін қамтамасыз етуде ерен еңбек етіп жүрген қызметкерлерге бұл ерекше қолдау болғаны рас. Іс-шараға арнайы 5 келіден астам бауырсақ пісірілді. Қаламыздың тұрғындары бұл акцияның қоғамдағы бірлікті нығайтуға және қарапайым еңбек адамдарына құрмет көрсетуге үлкен үлес қосқанын атап өтті. Тәтті бауырсақ пен шай таратылған қарапайым, бірақ жылулыққа толы іс-шара – Арқалық қаласындағы мейірімділік пен жанашырлықтың символына айналды.

Хәкім Абайдың он төртінші қара сөзінде: «Нағыз жүрек ісі – рақымдылық, мейірбандық және әртүрлі істе адам баласының бәрін өзіне тартып, бауырым деп, өзіңе ойлағандай болса игі еді», – дегені бар. «Жас эколог» үйірмесінің қатысушылары қаламыздың өміріне аса қажетті қызмет иелеріне тосыннан сый жасады. Расында, біреуге көмек көрсету үшін бай болып қажет емес, тек қана мейірімді жүрек пен таза ниет болса болғаны. Халқымыз қайырымдылықты қасиетті, қастерлі ұғым санаған. Сондықтан да, қоғамымызды ынтымақ пен қайырымдылық мекеніне айналдыру өзіміздің қолымызда.

Ниязбек ОРАЗОВ,
Ы.Алтынсарин атындағы гимназия мектебінің
«Жас эколог» үйірмесінің жетекшісі,
Арқалық қаласы