«Кітап достарын іздейді»

«Кітап – өмір ұстазы» демекші, жасөспірімдер кітап оқуды күнделікті әдет қылуы тиіс. Осы мақсатта Арқалық медициналық колледжінің кітапханасында жыл бойы мақала тақырыбымен аттас буккроссинг көрмесі тұрады.

Үйімізде шаң басып жатқан немесе оқылған кітаптарға «екінші өмір сыйлау», оқырмандар арасында «кітап алмастыру» акциясын жүргізу, әр түрлі жастағы оқырмандарды кітап оқуға шақыру, кітапханаға оқырмандарды тарту, күнделікті өмірдегі әр оқырманның кітап оқу әрекетін танымал етуге үлес қосу, әлемді үлкен кітапханаға айналдыру. Осы аталғандардың бәрі де буккроссинг қоғамдық қозғалысының негізгі көздегендері.

Қазіргі цифрлық технологиялар дәуірінде жастар дәстүрлі қағаз кітаптарды оқудан гөрі «оқу мүйістері» деп аталатын арнаулы электрондық гаджеттерді, телефоннан және компьютерден оқуға болатын кітаптардың электрондық нұсқалары мен аудиокітаптарды, сондай-ақ басқа да көптеген жаңалықтарды артық көреді. Кітап оқу адамның шығармашылық ізденісімен тығыз байланыста дамып, оның білімі мен адамгершілік мақсаттарын қалыптастырып, қоғамдық тарихи үдерістегі өз орнын айқындауына ықпал етеді.

Осы мақсатта жалпы адамзатқа жол көрсетіп отыратын рухани қара шаңырақ – кітапхана деп білемін. Кітапхана – өнер, білім ордасы, жастарды ізгілікке тәрбиелейтін қасиетті орын.

Айсулу АХАТОВА,
Арқалық медициналық
колледжінің кітапханашысы