Колледждің жұбы анықталды

Дүниедегі ең керемет сезімнің бірі – махаббат. Еліміздің сәуірдің 15-і күні атап өтілетін ғашықтар күніне орай колледжіміздің 1-курс білім алушылары арасында «Қозы Көрпеш пен Баян Сұлу-2021» байқауы ұйымдастырылды.

Бұл мереке 1999 жылдан бері аталып келе жатса да, күшіне енді ғана еніп, жастарды қызықтырып, бір ойдың, бір идеяның астында жинап отыр. Бүгінде бұл мереке ғашықтардың тағатсыздана күтетін күніне айналды. Қазақ халқының да махаббаттың шынарына айналған қос ғашықты дәріптейтін «Қозы Көрпеш – Баян Сұлу» күнін бүгінгі қоғамымызда бірі білсе, бірі біле бермейді. Колледжішілік «Қозы Көрпеш пен Баян Сұлу-2021» байқауы Арқалық политехникалық колледжінің жастар ісі жөніндегі комитетінің ұйымдастыруымен өтті.
Байқау қазақ жастарының арасында шынайылық пен адалдықты насихаттау, жастардың бойында эстетикалық тәрбиені қалыптастыру, құндылықтарды, ұлттық болмысты ояту, сондай-ақ жастарымызды ұйымшылдыққа, бір-біріне деген сыйластыққа тәрбиелеу мақсатын көздеді. Аталған байқауға 5 жұп қатысып, әр кезең бойынша бақтарын сынады. Қатысушыларға әділ бағасын беретін қазылар алқасы тағайындалып, қаламыздағы «Жас Отан» ЖҚ төрағасы Данияр Қожахметов келді. Тартысқа толы сайыста 2019 жылы атаулы байқауда жүлделі бірінші орынды иеленген жұптарымыз, колледжіміздің түлектектері Шерхан Тұңғышев пен Гаухар Қапсұлтан қонақта болды.
Жалпы байқау төрт кезең бойынша өтті. Алғашқы «Таныстырсам өзімді» кезеңінде екі жұп өздерін таныстырса, екінші – «Махаббат кедергісі» кезеңінде жұптарымыз ортаға шакырылып, қыздарымыз өз жұптарының көзін байлап, дауыстап айту арқылы түрлі кедергілерден өтті. Келесі «Өнерлі жұп» кезеңі – шығармашылыққа негізделді. Әр жұп өз өнерлерін көрсетті: ән айту, би билеу, көркемсөз оқу және т.б. Ал соңғы «Әдем-ау»  кезеңінде қатысушыларымыз сән киім үлгісін көрсетті.
Нәтижесінде жүлделі 3-орынды Әлібек Қален мен Меруерт Пазылбек жұбы, Дамир Төлеуханов пен Кристина Красикова жұбы иеленді. Екінші орынға Жандос Жанділдаев пен Құлпынай Арыстанова ие болды. Ал жүлделі 1-орынды Анвар Жұмақанов пен Азиза Уринбекова қанжығасына байласа, «Қозы Көрпеш пен Баян Сұлу-2021» аталымы мен Бас жүлдеге Диас Жарасқанов пен Камилла Насирила жұбы ие болды. Қатысушыларымыздың барлығы да жоғары дайындықпен келгенін дәлелдеді. Барлық қатысушы жұптарға сәуірдің 15-і күні қаламыздағы «SPORT-kafe_ajarmoll» сауықтыру орталығына «Махаббат аялдамасы» атты кино әлеміне жолдама берілді.

Алданыш БАЙЖУМИНА,
Жастар ісі жөніндегі
комитеттің жетекшісі,
Арқалық қаласы