«Қыз өссе – елдің көркі»

Осындай атауда Қостанай қаласындағы №40 бөбекжай-бақшасында қыздарға дұрыс бағыт-бағдар сілтеу, сондай-ақ жастар арасында салт-дәстүрімізді насихаттау мақсатында «Қыз сыны-2021» байқауы өткізілді.

Сайысқа «Мен қазақтың қызымын», «Білім мен дәстүр», «Қыз өссе елдің көркі, гүл өссе жердің көркі», «Қыздың бір өнері – ас пісіру», «Он саусағынан өнер тамған», бағыттары бойынша балабақшадағы жас педагогтер қатысты. Арулар өздерін таныстырудан бастап, «Сан сұрақтан сүрінбей самғап ұшқын» дегендей, «Білім мен дәстүр» бөлімінде қазақтың ұлттық салт-дәстүрлерінен білімдерін жан-жақты көрсете білді. Ал «Қыз өссе елдің көркі, гүл өссе жердің көркі» бөлімінде ұлттық сәнді киімдерін паш етіп, «Қыздың бір өнері – ас пісіру» бөлімінде аруларымыз өздері дайындаған бауырсақты әділ қазылар алқасына ұсынды.

Сайыс соңында «Он саусағынан өнер тамған» бөлімінде арулар өз өнерлерін көрсетті. Бұл сайыста жас педагогтер өте жақсы дайындалып, өнерлерін жан-жақты көрсетуге тырысты. Әділ қазылар алқасының шешімі бойынша бірінші орынды ортаңғы «Б» тобының тәрбиешісі Жанар Ташетова, екінші орынды кіші «Б» тобының тәрбиешісі Гүлназ Ертанова, үшінші орынды Оксана Терентьева жеңіп алды.

Сауле БРАХМЕТОВА,
№40 бөбекжай-балабақшасы
қазақ тілі пәнінің мұғалімі,
Қостанай қаласы