Мамандығым – мақтанышым

Ы.Алтынсарин атындағы Рудный әлеуметтік-гуманитарлық колледжінің оқу жоспарына сәйкес «Мектепке дейінгі білім беру және тәрбиелеу» мамандығының 2-курс білім алушылары алғашқы тәжірибелерін облыстың мектепке дейінгі мекемелерінде өткізді.

Қай кезде де кәсіби тәжірибенің берері мол. Осы орайда ойға түйгені мен үйренгендерін «Мектепке дейінгі білім беру және тәрбиелеу» мамандығының 1-курс студенттеріне ақпарат беру мақсатында танымдық бағыттағы дөңгелек үстел өтті. Іс-шара барысында мектепке дейінгі мекемелерде тәжірибе өту мәселесі талқыланды.

Білім алушыларымыз белсенділік танытып, мамандық туралы: нақыл сөздер, оны таңдау факторлары мен жолдары әрі теориялық білімдерін де нақты көрсете білді. Тәжірибе барысында олар қызықтырған сұрақтарына толық жауап та ала білді. Атап айтқанда: психологиялық-педагогикалық бейімделу, бүлдіршіндермен жұмыс барысындағы қиындықтар, педагогикалық әдістердің қолдану ерекшеліктері, тәрбиешіге қойылатын талаптар, дидактикалық материалдар, ата-аналармен жұмыс, нормативтік құжат түрлері және т.б.

Өз кезегінде 2-курс білім алушылары өз пікірлерімен, өз қолдарымен жасалған қызықты көрнекіліктермен: «саусақ театры», ертегі кейіпкерлері, мамандық иелерімен бөлісіп, кеңестерін де айтты. Олар «педагог-тәрбиеші қызметінің маңызы: бала тәрбиесінде қызықтыра отырып, оқу іс-әрекетіне аударту, педагогикалық қарым-қатынасты шебер ұйымдастыра білу» деген ортақ пікірге келді.

Сәулеш ҚАНЕШОВА,
Ы.Алтынсарин атындағы
Рудный әлеуметтік-гуманитарлық
колледжінің жалпы білім беру
пәндерінің оқытушысы