Мамандық таңдау – маңызды іс

Еліміздің экономикасының артуы оны басқаратын және жүргізетін мамандарға тікелей байланысты екені бәрімізге мәлім. Әсіресе құрылыс саласын «экономиканың локомативі» деп айтсақ та болады.

Құрылыс саласын жас орта буын мамандарымен толықтыру мақсатында біздің Қостанай құрылыс колледжінің атқарып жатқан жұмыстары орасан зор. Дей тұрғанмен, студенттердің 80%-ы орыс тілінде білім алуда. Осы олқылықтың орнын толтыру мақсатында келер жылға абитуренттер жинау үшін бар күшімізді салудамыз. Алдымызда қазақ тілінде білім алушылардың санын тағы да 2 топқа толықтыру міндеті тұр. Осыған орай біздің педагогтерден құралған шағын топ Амангелді ауданының мектептерінде болып қайтты.
Үгіт-насихат жүргізу барысында біздің делегация Жаңа ауыл, Мейірманов, Ы.Алтынсарин, Б.Қолдасбаев мектептерінде болып, оның басшыларымен және оқушылармен сұхбаттасып, бітіруші 9 және 11-інші қазақ сыныптарына болашақта жақсы маман болудың әрі мемелекеттік тілде білім алудың маңыздылығы баса айтылды. Әңгіме барысында бұл кездесулердің сәтті өтуіне аудан басшылығының ықпалы да болғаны белгілі болды. Соның нәтижесінде сынып жетекшілері А.Байдилдина, С.Амиргазин, директордың тәрбие ісі жөніндегі орынбасарлары және мектеп басшыларымен уақытылы кездесу ұйымдастырылды. Екі күндік іссапар алдағы уақытта оң нәтижесін береді деген ойдамыз.
Қызу пікірталас барысында ата-аналар мен оқушылардың тарапынан қойылған сұрақтар аз болған жоқ. Біздің колледж тарапынан айтылған ұсыныстар, түсіндірме әңгімелер, мектептерге таратылған буклеттер, көрсетілген қысқа метражды фильмдер жоғарыдағы сұрақтарға толық жауап берді деп ойлаймын. Әсерлі кездесулерден соң екі тарап та өзара мекенжайлар мен телефон нөмірлерімен алмасты. Оқу жылы аяғына дейін үгіт-насихат жұмыстары жалғасады деген үміттеміз. Қазірдің өзінде келем деушілердің саны аз емес, дегенмен әлі жұмыс көп, мақсат зор.

Дидар ТАСТЕМБЕКОВА,
Қостанай құрылыс колледжінің
бөлім меңгерушісі