Мамандық таңдаудың маңызы

Адам өміріндегі маңызды кезеңдердің бірі – мамандық таңдау. Соған орай, Қостанай гуманитарлық колледжінде арнайы пәндер апталығы аясында «Менің мамандығым», «Менің өндірістегі тәжірибем» атты конференция өтті.

Іс-шара білім алушылардың ойлау қабілеттерін дамытып, болашақ мамандыққа байланысты ұғымдарын тереңдетіп, қызығушылықтарын арттыру, жұмыстың мазмұнымен және мағынасымен айрықшаланатын мамандық әлемінің алуан түрлілігі туралы түсінік қалыптастыру мақсатында ұйымдастырылды. Конференцияның міндеттері: өндірістік тәжірибе барысында студенттердің алған білімдерін бекіту және тереңдету; болашақ маманның бойында адамгершілік қасиеттерін қалыптастыру; жас мамандарды даярлаудың кәсіби деңгейін арттыру; еңбекке шығармашылық қатынасты, саналы еңбек және өндірістік тәртіпті тәрбиелеу; төменгі курс студенттерін өндірістік практиканы ұйымдастыру және өту ережелерімен, өндірістегі ҚТ ережелерімен және өндіріс жағдайында психоэмоционалды бейімделумен таныстыру.

Алқалы жиынға «Құқықтану», «Бағдарламалық қамсыздандыруды құрастырушысы», «Қазақ тілі мен әдебиет пәнінің оқытушысы» мамандықтарының білім алушылары қатысты. Олар мамандықтары туралы толық ақпарат беріп, тәжірибеде қалай қолданғаны туралы баяндады. Қатысушылардың жұмыстарына әділ баға беретін қазылар алқасы шақырылды, олар: Қостанай облысының Әділет департаментінің бас маманы Салтанат Аитова; «ҚР Сот әкімшілігінің Қостанай облысы бойынша департаменті» РММ персоналды басқару (кадр қызметі) бөлімінің бас маманы Қалампыр Ипбергенова; Қостанай қаласындағы А.Бірімжанов атындағы ЖББМ қазақ тілі мен әдебиеті пәнінің мұғалімі Мейрамкүл Әлиасқарова.

Жүсіпбек Аймауытов: «Мамандықтың жаманы жоқ, бірақ мұның кез келгеніне икемділік қажет. Бұл жай күнелту, тамақ асыраудың ғана жолы емес, үлкен өнерді, зор шеберлікті қажет ететін нәрсе», – деген екен.

Гүлвира САИДОВА,
Қостанай гуманитарлық колледжінің арнайы
пәндер оқытушысы