Мерзімді әскери қызмет – жастарға жаңа мүмкіндіктер

Н.Құлжанова атындағы Торғай гуманитарлық колледжінде бірінші курс студенттеріне арналған ақпараттық-түсіндіру жұмыстары ұйымдастырылып, мерзімді әскери қызметтің ерекшеліктері, маңызы және жастарға беретін мүмкіндіктері туралы кеңінен түсіндірілді.

Жастардың бойында отансүйгіштік сезімді қалыптастыру, азаматтық жауапкершілігін арттыру және әскери қызметтің маңызын түсіндіру – бүгінгі күннің маңызды міндеттерінің бірі. Осы бағыттағы жұмыстарды жүйелі түрде жүргізу мақсатында ұйымдастырылған кездесудің негізгі мақсаты – студенттерге мерзімді әскери қызметтің қоғамдағы және азамат өміріндегі маңызын түсіндіру, әскери-патриоттық тәрбиені нығайту, Отан алдындағы азаматтық жауапкершілікті қалыптастыру.

Іс-шара барысында студенттерге мерзімді әскери қызмет туралы негізгі мәліметтер беріліп, әскери қызметтің артықшылықтары мен мүмкіндіктері түсіндірілді. Сондай-ақ әскери қызмет барысында қалыптасатын тәртіп, жауапкершілік, төзімділік, өзіне деген сенімділік, одан бөлек, командалық жұмыс дағдыларының маңызына ерекше назар аударылды. Студенттерге әскери қызметтің негізгі бағыттары, әскери мамандықтар мен қызмет барысында меңгерілетін дағдылар туралы ақпарат ұсынылды. Әскери қызметтің жастардың тұлғалық дамуына, жауапкершілік пен тәртіпті қалыптастыруға ықпалы да кеңінен айтылды.

Кездесу барысында мерзімді әскери қызметті аяқтағаннан кейінгі мүмкіндіктерге де тоқталып, әскери салада білімін жалғастыру, кәсіби бағытта даму және жаңа тәжірибе жинақтау жолдары туралы түсінік берілді. Мұндай ақпараттық-түсіндіру жұмыстары жастардың әскери қызметке деген қызығушылығын арттырып қана қоймай, олардың ел алдындағы жауапкершілікті сезініп, Отан қорғаудың мәнін түсінуіне ықпал етеді. Жас ұрпақтың бойында елге деген сүйіспеншілік, жауапкершілік пен азаматтық ұстанымды қалыптастыру – баршамызға ортақ міндет.

Ниязбек ОРАЗОВ,
Н.Құлжанова атындағы
Торғай гуманитарлық
колледжінің бастапқы
әскери дайындық педагогі,
Арқалық қаласы