Өңірлік университеттегі қайырымдылық бал

Ахмет Байтұрсынов атындағы Қостанай өңірлік университетінде Балалар жылына орайластырылған қайырымдылық балы өтті. Аталмыш іс-шара Ахаң атындағы қара шаңырақтың жылдағы дәстүріне айналған.

Жыл сайын балдан жиналған қаражат қымбат емді қажет ететін науқас балалардың немесе университеттің студенттерінің емделуіне аударылады. Биылғы қайырымдылық шарасы церебралды сал ауруына шалдыққан 7 жасар Диаз Азаматұлына қолдау көрсету мақсатында ұйымдастырылды. Диаздың еміне университет студенттері 256 мың теңге жинап берді.

Ауқымды іс-шараға «Зодиак» кинотеатры, «El optica» толық циклді оптикасы, «Esthetic Dent» стоматологиялық орталығы, «Aristocrat» барбершобы, А.Байтұрсынов атындағы ҚӨУ-дің ресми бренді «Baitursynov shop», «San Seven» фаст-фуд мейрамханасы, «Tia beauty» кореялық косметика дүкені және кірпікті ұзарту шебері Dinara Guseinkulieva демеушілік жасаса, ҚӨУ-дің баспасөз қызметі мен студенттік Медиа-студия ақпараттық қолдау көрсетті.

Бағдарлама аясында қатысушылар корольдік, классикалық және заманауи бағытта 3 вальс биледі. Сонымен қатар әр институт визиткалар дайындап, анимациялық фильмдердің кейіпкерлерін сомдады. «DreamWorks» анимациялық студиясын ауыл шаруашылығы институты ұсынды. «Disney» студиясының кейіпкерлерін инженерлік-техникалық институттың студенттері сөйлетті. Педагогикалық институт «Pixar» студиясының анимациялық кейіпкерлерін көрсетті. Ал Экономика және құқық институты «Союзмультфильм» анимациялық студиясының өнімдерін ұсынды.

Әсем балға қатысушыларға Жастар ресурстық орталығының директоры Абай Дүйсеков, «Өнер» мәдениет үйінің хореографы, «Бадрисафа» би ансамблінің жетекшісі Саяхат Сумамбаева, «Қостанай облысының спорттық би федерациясы» қоғамдық бірлестігінің жетекшісі Андрей Нужный және бал билерінен халықаралық дәрежедегі спорт шебері, «Хоум» шығармашылық студиясының директоры Владислав Сахно қазылық етті. Ал арнайы қонақ ретінде 2019 жылғы қайырымдылық балының ұйымдастырушысы, қазіргі уақытта Ахаң атындағы қара шаңырақтың докторанты Әлиев Орынбай шақырылды.

Біріншіден, көмекке мұқтаж жанға үміт сәулесін сыйласа, екіншіден, өнер арқылы әлемді әдемі етеуге деген ұмтылысты біріктірген қайырымдылық балы алдағы уақытта жалғасын таба бермек.

Жамал ШАУКЕН,
суретті түсірген
Амангелді ТЕЛЬМАНОВ