«Өнер – өмір айнасы»

«Қазақтың жүрегі тоқтамасын, өнердің жүрегі тоқтамасын деп отырғаным сол. Өнерін өлтіріп алған қазақ ел болып оңбайды, елінен айнып қалған жүрек – жүрек болып соғып жарытпайды. Екеуі бөлінбес бір бүтін, тұтас дүние деп есептеймін», – деген еді Әшірбек Сығай. Шынымен де, нағыз өнер – қазақтың өзінде, қазақтың даласында жатыр. Әшірбек Төребайұлының сөзінің арғы жағында өнердің құдіреті мен оған бет бұрған адамның кіршіксіз ниеті жатыр. Ал, осы өнерге ден қойған жас ұрпақтың жетістігін атап, оған ортақ болу, ілтипат білдіру – жақсылықтың нышаны.

Соның дәлелі ретінде Нәзипа Құлжанова атындағы Торғай гуманитарлық колледжінің білім алушылары әркез өнердің биігінен көрініп келеді. Достық қарым-қатынасты нығайту мақсатында Арқалық политехникалық колледжінің қызметкерлері мен білім алушыларына арнап концерт ұйымдастырылды. Концертке 50-ге жуық волонтер мен белсенді жастар қатысты. Волонтерлеріміз тренинг өткізіп, күмбірлете күй тартылып, белсенді жастарымыз әуелете ән салып, биші ұлдар флешмоб биледі. Ұлттық құндылықтарымыздың насихатталуы мен өнеріміздің шарықтауы еліміздің дамуына зор үлес қосары сөзсіз.

Ниязбек ОРАЗОВ,
Н.Құлжанова атындағы Торғай гуманитарлық
колледжінің жастар ісі жөніндегі комитетінің төрағасы,
Арқалық қаласы