Студенттер олжалы оралды

Қостанай төрінде гір спортынан жастар арасында өткен ел чемпионатында еліміздің 16 өңірінен 200-ге жуық үміткер бақ сынады. Бұл додада А.Байтұрсынұлы атындағы ҚӨУ студенттері де бақ сынап, жоғары нәтиже көрсетті.

Мықты дайындықпен келген «Дене шынықтыру және спорт» білім беру бағдарламасының студенттері әр салмақ дәрежесінде үздіктердің қатарынан көрініп, облыс қоржынына бағалы жүлделер салды. Атап айтқанда, 63 келіге дейінгі салмақта сынға түскен Никита Стригин күміс жүлдені иеленсе, 68 келіге дейінгі салмақ дәрежесінде Вадим Стригин «серппе» жаттығуында гір тасын 95 рет көтеріп, ел чемпионы атанды. Дәл осы салмақта Антон Стельмах «жұлқа көтеру» жаттығуында 148 рет көтеріп, екінші тұғырға тұрақтады. 95 келіден жоғары салмақ дәрежесінде сынға түскен Владислав Литвинов «серппе» жаттығуында 90 рет көтеріп, күміс жүлдені қанағат тұтты.
Студенттердің бұл жарқын жеңісі өңірдегі студенттік спорттың жүйелі дамып, жоғары оқу орындарында кәсіби дайындық деңгейінің артқанын көрсете білді. Қазіргі таңда гір спортына қызығушылық артып, жастар арасында бұқаралық сипат алып келе жатқанын байқауға болады. Осындай дүбірлі додаларда топ жарған спортшыларымыз алдағы уақытта да өңірдің абыройын асқақтата берері сөзсіз.

Айгерім БАХИТБЕК,
А.Байтұрсынұлы атындағы
ҚӨУ журналистика мамандығының
3-курс студенті