Тәуелсіз еліміздің рәміздері

Жылдағы дәстүрге сай, Арқалық политехникалық колледжінде жастарды елінің Мемлекеттік рәміздерін қастерлеп, құрметтеуге тәрбиелеу мақсатында 4 маусым – Рәміздер күніне арналған «Мемлекеттік рәміздер – ұлт мақтанышы» атты салтанатты жиын өтті.

Егемен еліміз жер бетіндегі басқа мемлекеттермен терезесі тең, өркениетті ел ретінде танылып, 1992 жылы маусым айының 4-інде Мемлекеттік рәміздеріміз – ту, елтаңба, әнұран бекітілді. Тұңғыш Президенттің Жарлығымен, осы күн – ҚР Мемлекеттік рәміздер күні болып белгіленді. Сондай-ақ, Мемлекеттік рәміздердің сипатамасы мен ресми пайдалану тәртібі Ата Заңмен бекітілді. Қазақстан Республиканың әрбір азаматы мемлекеттік рәміздерін құрметтеуге міндетті екені айтылған.
Мемлекеттік рәміздер белгілі бір елдің өзіндік өмір салтын, бүкіл болмыс ерекшелігін, айрықша арман аңсарын, байланыс мұраттарын білдіреді. Осы бір қасиетті белгілердің мәнін әрбір азамат терең түсініп, оны қастерлей білуі қажет. Мерекеге орай ұйымдастырылған салтанатты жиында колледжіміздің белсенді жастары рәміздерімізге деген құрметін өз түсінігінде жеткізе білді. Ал, колледжіміздің вокал жетекшісі С.Хамзинаның дайындауымен әнұран орындалып, патриоттық әндер шырқалып, тақпақ та айтылды.
Тәуелсіздігіміздің тұмарына айналған Мемлекеттік рәміздеріміз болашаққа бастаған көшімізді демеп, игі істерімізді қолдай берсін! Еліміздің мәртебесі биік, өмірі ұзақ болып, Мемлекеттік рәміздерімізге деген құрмет арта берсін!

Алданыш БАЙЖУМИНА,
Арқалық политехникалық
колледжінің Жастар ісі жөніндегі
комитет инспекторы