TEDx форматындағы кездесу

Н.Құлжанова атындағы Торғай гуманитарлық колледжінің жастар ісі жөніндегі комитетінің бастауымен «Біртұтас тәрбие» бағдарламасын негізге ала отырып, «Білім – алынбас қамал» жобасы аясында жастар ресурстық орталығының өкілдерімен кездесу өтті.

TEDx форматындағы іс-шараға спикер ретінде жастар ресурстық орталығының директоры Данияр Қуанышұлы, колледжіміздің жастар ісі жөніндегі комитетінің төрағасы ретінде мен, Ниязбек Рамазанұлы және колледжіміздің президенті Гаухар Бауыржанқызы қатысты. Кездесу барысында еңбек нарығындағы қажетті мамандықтар, жастардың өзін-өзі қандай салаларда белсенді дамытуы қажет екендігі, медиа-менеджмент және оның жұмысқа орналасудағы рөлі, жастарды кәсіпкерлікке баулу, сонымен қатар кәсіпкерге қажетті дағдылар сияқты маңызды мәселелер талқыланды.
Іс-шара аясында спикерлер мансап пен жеке өсу үшін өмірлік дағдыларды дамытудағы тәжірибелерімен бөлісті. Осы айтылған кеңестер жастарды болашақ өмірлік жоспарларына ынталандырады деп сенемін. Спикерлер жастарға өз өмірінде табысты болу үшін өзіне және мүмкіндіктеріне сенуге көмектесуді басты мақсат етіп қойғанын атап өтті. Қатысушылар да өз ұсыныстарын айтып, сұрақтар қойды. Спикерлер жастардың мәселелеріне мән беріп, олардың дамуына жағдай жасауға дайын екендіктерін жеткізді.

Ниязбек ОРАЗОВ,
Н.Құлжанова атындағы
Торғай гуманитарлық колледжінің жастар ісі
жөніндегі комитетінің төрағасы,
Арқалық қаласы