Жаңашыл ізденістердің бастауы

Күні кеше күздің алғашқы күнімен қатар келген Білім күні Н.Құлжанова атындағы Торғай гуманитарлық колледжімізде де салтанатты түрде аталып өтті. Еліміздегі барлық білім ордалары есіктерін айқара ашып, білім алушыларын ерекше қуанышпен қарсы алуда.

Бұл күн колледж студенттері үшін алғашқы студент атанған толқынысқа толы күн болса, енді бірі үшін аяулы ұстаздарымен қауышу, ал өзгелер үшін сағыныса кездескен достардың басын біріктіре отырып білімге жетелейтін күн. Білімі биік шыңдарды бағындыратын оқу орнымызға биылғы жылы 162 білімалушыға көбейіп, 9 топқа топтастырылды.

Алғашқы болып қызыл кілем үстімен шеруді БМ-11 тобын топ жетекшісі Салтанат Оралбаева және БМ-12 тобын топ жетекшісі Гулбахрам Сейдагазина, МД-11 тобын топ жетекшісі Зайгуль Хасенова, МД-12 тобын топ жетекшісі Толқын Аубакирова, МД-13 тобын топ жетекшісі Ақжарқын Насрединова, МД-14 тобын топ жетекшісі Динара Білісбекова, ДМ-11 тобын топ жетекшісі Бағдат Мухамеджанов, ДМ-12 тобын топ жетекшісі Ернур Бултриков, музыка бөлімінің 1-курс студенттерін топ жетекшісі Гульдана Беккожина бастап келді.

Салтанатты жиынды әнұранымызбен бастай отырып, алғашқы құттықтау сөз колледж директоры Сандуғаш Орекенқызына беріліп, іс-шара әдемі жылы лебізбен басталды. Балаларының білімін біздің колледжге сеніп тапсырған ата-аналарымыз үшін де мейрам екені сөзсіз. Осы орайда колледж табалдырығын аттаған білім алушыларымызға өз лебізін білдіру үшін ата-аналар атынан құттықтау сөз кезегі Эльмира Дузелбаевнаға да беріліп, ол кісі өз сөзінде аналық ақ тілегін, ақ батасын бере білді. Салтанатты шара барысында «Студент әліппесі» табысталды. Колледжіміздің жастар ұйымы білім алушылардың көшбасшылық қасиеттерін, дарынын алға тарту мақсатында біршама жұмыс жасаса, 22 түрлі үйірмелер білім алушылардың жан-жақты қабілеттерін, икемділіктерін одан әрі дамытуда біршама жұмыстар атқарады.

Сол үйірмелердің бірі – «Нәзипа ізбасарлары» үйірмесі білім алушыларды әдеби сөйлеуге, көркемдікке үйрете отырып, қабілеттерін анықтап, өздігінен білім алуға құштарлықтарын дамыта отырып, эстетикалық, этикалық тұрғада қалыптастыра біледі. Салтанатты шара соңында оқытушылар қауымы мен білім алушылар ҚР Президентінің халыққа Жолдауын мұқият тыңдап, тарқасты. Біз жастарымыздың әрқайсысымен мақтанамыз. Және биылғы жаңа оқу жылында енді ғана колледж табалдырығын аттап отырған барша білім алушыларға сәттілік тілей отырып, білімді маман иесі болуларын тіледік.

Луиза АҚЫЛБЕКОВА,
Н.Құлжанова атындағы
Торғай гуманитарлық
колледжінің арнайы
пәндердің оқытушысы,
Арқалық қаласы