«Жас талап-2023»: үздіктер анықталды

Жас таланттардың өнердегі қадамдарын шыңдап, жаңа есімдерді жарыққа шығару мақсатында Н.Құлжанова атындағы Торғай гуманитарлық колледжінің жастар ісі жөніндегі комитетінің ұйымдастыруымен «Жас талап-2023» дарындар додасы биыл да жалғасты.

Н.Құлжанова атындағы Торғай гуманитарлық колледжінің білім алушылары әркез өнер биігінен көрініп келеді. Жүзден жүйрік шыққан жас өрендер хореография, вокал, аспаптарда ойнау шеберлігі, театрлық өнер, авторлық ән, авторлық өлең, айтыскер ақындық өнері, жүргізушілер аталымдары бойынша өзара бақ сынасты. Әр топ 25-30 минут көлемінде аталымдар бойынша концерттік бағдарламаларын көрсетіп, көрерменнің ыстық ықыласына бөленді.

Сайыста төрелік жасаған колледж директорының тәрбие ісі жөніндегі орынбасары Жанар Сериковна, колледжіміздің президенті Қаби Мөлдір және колледж түлегі Ақжол Дарханұлынан құрылған комиссия құрамы сахна тәртібін қатаң қадағалай отырып, өнерпаздарымызды әділетті бағалап, әр номинация үздіктерін жекелей марапаттап, жүзден жүйрік шыққан топтарға орындар беріліп, дипломдар табыс етілді.

Жүлделі І орынды МУЗ-1 тобы, ІІ орынды БМ-12 тобы қанжығасына байласа, жүлделі ІІІ орын ДМ-11 тобына бұйырды. Ұлттық құндылықтарымыздың насихатталуы, өнеріміздің шарықтауы біздің елдің дамуына зор үлес қосары сөзсіз. Өнер – біздің рухани қазынамыз. Талпыныстары жоғары талантты жас буынның алдағы уақытта биіктен көріне беруіне тілектеспін. Болашағынан зор үміт күттіретін өрендерге сәттілік серік болғай.

Ниязбек ОРАЗОВ,
Н.Құлжанова атындағы
Торғай гуманитарлық колледжі
Жастар ісі жөніндегі
комитетінің төрағасы,
Арқалық қаласы