Жастар шабытын шарықтатқан көктем

Дәстүрлі «Студенттік көктем-2026» фестивалі биыл да ерекше қарқынмен өтті. Көктемнің шуақты күндерімен қатар келген мәдени жоба өңірдің ең талантты, белсенді студенттерін бір алаңға тоғыстырып, олардың өнері мен соны ойларына кең мүмкіндік ашты.

Фестивальге облыстың жеті жоғары оқу орнынан іріктелген студенттер қатысып, бір айға жуық уақыт бойы өзара сынға түсті. Осы уақыт ішінде 14 түрлі іс-шара ұйымдастырылып, әрқайсысы көрермен көңілінен шықты. Концерттік бағдарламалар, театр қойылымдары, вокалдық және би өнері, шығармашылық байқаулар мен авторлық жобалар – мұның бәрі студенттердің жан-жақты қабілетін айқын көрсетті. Әр қатысушы өз өнерін шыңдап қана қоймай, тәжірибе алмасып, жаңа достар тапты.
– Біздің мақсатымыз – облыс жастары арасында шығармашылық әлеуетті дамытуға жағдай жасау, талантты студенттерді анықтап, оларға қабілеттерін көрсетуге мүмкіндік беру. Сондай-ақ жоғары оқу орындарының студенттері арасындағы ынтымақтастықты нығайтып, шығармашыл жастардың бастамаларын қолдауды көздейміз, – дейді ұйымдастырушы Дарья Стоногина.

Шығармашыл іс-шара барысында қатысушылар жоғары дайындық деңгейін көрсетіп, заманауи өнерге деген тың көзқарастарын паш етті. Әр қойылым мен әр өнер нөмірі – үлкен ізденіс мен еңбектің жемісі. Сондықтан фестиваль жастардың өнерін ғана емес, жауапкершілігін, бірлік пен командалық рухын да шыңдай түсті. Қатысушылардың өздері де фестивальдің маңызын ерекше атап өтті.
– Менің ойымша, «Студенттік көктем» фестивалі қызықты өтті. Бұл – жақсы бастама, шабыт сыйлайтын жоба. Жоғары оқу орындарының әрқайсысы да жоғары деңгейде дайындалған. Біз де барымызды салдық. Барлық қатысушыларға сәттілік тілеймін, – дейді ҚИнЭУ студенті Сағыныш Мырзахметова.

Фестиваль аясындағы іс-шаралар студенттермен шектелмей, оқытушыларды, қоғам өкілдерін және серіктестерді де қамтыды. Бұл жастар мен қоғам арасындағы байланысты нығайтып, ортақ мәдени кеңістік қалыптастыруға ықпал етті. Қорытынды кезеңде үздік командалар мен жеке қатысушылар анықталып, олар 2026 жылдың студенттік шығармашылығының айқын өкілдері ретінде танылды. Дегенмен, аталмыш фестивальдегі ең басты жеңіс – жүлде емес, жаңа тәжірибе, жаңа таныстықтар мен шығармашылыққа деген сенім.
«Студенттік көктем-2026» тағы бір мәрте жастардың әлеуеті зор екенін дәлелдеді. Өнер мен шабытқа толы мереке алдағы уақытта да талай жастың қанатын қатайтып, үлкен сахналарға жол ашары сөзсіз.

Аружан АНИСОВА,
А.Байтұрсынұлы атындағы
ҚӨУ журналистика
мамандығының
3-курс студенті