Жастар студент қатарына қабылданды

Н.Құлжанова атындағы Торғай гуманитарлық колледжінің жатақханасында студенттерді бір-бірімен жақын араласу, жақсы көңіл-күй сыйлау арқылы адамгершілік қасиеттерге тәрбиелеу мақсатында«Student party» атты кеш ұйымдастырылды.

Білім ордасын тәмамдап шыққан кешегі оқушы – бүгін студент атанды. Әрбір оқу жылын бірінші курс студенттері үлкен толқумен күтеді. Олардың әрқайсысы өзіндік қарым-қабілетімен ерекшеленеді, дегенмен бәрін бір сөз біріктіледі, ол – студент. Алайда, әр бірінші курс студенті «студенттер қатарына кабылдану» рәсімінен өту арқылы шынайы студент бола алатынын біледі. Колледж жатақханасында оқу ордасының табалдырығын аттаған бірінші курс білімгерлерін студенттер қатарына қабылдау кеші өтті. Қиялдарын қанаттарына байлап, асқақ арман жетелеген жас ұландар өмір жолындағы қызықты да бақытты кез – студенттік шақтың басталғанын енді сезінгендей болды.

Мерекелік кеш шымылдығын ашқан колледжіміздің тәрбие ісінің меңгерушісі Гүлхашима Оразова мектеп бітіріп, үлкен өмірге жолдама алу, студент атану – әрбір жастың арманы екендігін, студенттік жылдар – саналы өмірдің шаттыққа толы кезеңі екендігін, осы қуанышқа толы сәттерді тиімді пайдалана отырып, білімнің тереңіне бойлауға шақырып, әрқашан да демеу болатынын айтты. Шын мәнінде бүгінгі жас – ертеңгі елдің мызғымас тірегі, келешек келбеті. Сол себепті олардың білімді, бәсекеге қабілетті, жан-жақты әлеуметтенуі – ел дамуындағы аса маңызды фактор саналады

Іс-шара барысында 1-курс студенттері бар өнерлерін ортаға салды. Атап айтсақ, БМ-11 тобының білім алушылары Айсұлу Жұмаханова мен Аружан Соқабаеваның «Ана» өлеңі, 1-курс студенттерінен құралған КВН тобының өнері ерекше көңіл-күй сыйлады. МД-11 тобының студенті Ақбөпе Тынымбай мен БМ-11 тобының студенті Әмина Иманбекова «Мен сіздерді жақсы көрем» әнімен, МД-12 тобының студенті Ақбота Әділбек, Муз-1 тобынан Нұрсәуле Қабден, БМ-12 тобынан Жадыра Какенова «Рухты ару» әнімен, қыздар тобынан құралған мың бұралған бишілер, «Балбырауын» күйін нақышына келтіріп отырдаған күйші студенттеріміз ерекше көзге түсті. Одан бөлек 1-курс ұл-қыздарынан құралған жұппен билеу өнері де керемет әсер сыйлады.

Артынша студенттер мен оқытушылар арасында ұйымдастырылған ойын өте қызықты әрі тартысты өтті. Кеш соңы игі тілекпен аяқталды: «Үлкен өмірге қадам басқан жастарды студенттер қатарына ресми қабылдануымен тағы да құттықтай отырып, оларға мықты денсаулық пен адами қарым-қатынастың жылуын, бақыт, көтеріңкі көңіл-күй, шығармашылық табыс, күш-жігер, еңбекқорлық, қызықты қоғамдық, мәдени және ғылыми өмір тілейміз».

Жанар БИРМАКАНОВА,
Н.Құлжанова атындағы
Торғай гуманитарлық колледжі
жатақхана тәрбиешісі,
Арқалық қаласы