Жастар студенттік қатарға қабылданды

Н.Құлжанова атындағы Торғай гуманитарлық колледжінің білім алушы жас толқындарына жаңа леп қосылды. Кеше ғана мектеп табалдырығынан аттап, жоғары оқу орнына түссем деген ізгі ой қалықтаған буын, бүгінде студент атанды.

Бұл әсерге толы сәт колледжіміздің бірінші курс студенттеріне арналған «Студенттік қатарға қабылдау» салтанатты іс-шарасында көрініс тапты. Арқалық қаласындағы Қазақ жасөспірімдер театрында колледжіміздің жастар ісі жөніндегі комитеті мен волонтерлер мүшелерінің ұйытқы болуымен өткізілген мерекелік кеш барысында студент қатарына қабылданған білім алушыларды 2-3 курс топ басшылары құттықтап, жылы лебіздерін білдірді.

Жоғары курс білім алушылары студенттік өмірдің құпияларымен бөлісіп, көңілді ойындар ұйымдастырып, күмбірлете күй тартып, әуезді әндер орындап, заманауи билер мен концерттік бағдарламасын ұсынды. Мерекелік іс-шараның соңы би кешіне ұласты. Болашақ мамандарды 45 жылдық тарихы бар оқу орны студенттерінің қатарына қабылдануымен құттықтаймыз! Сынақ кітапшаларыңыз тек жақсы бағаларға толы болсын!

Ниязбек ОРАЗОВ,
Жастар ісі жөніндегі комитетінің төрағасы,
Арқалық қаласы