Жастарға кәсіптік бағдар

Кәсіптік бағдар беру жұмысы жас ұрпақтың саналы түрде болашақ мамандығын таңдауына мүмкіндік жасайды. Арқалық политехникалық колледжінде кәсіптік бағдар беру жұмыстары жоспарға сәйкес атқарылуда.

Жуырда колледждің кәсіптік бағдар беру тобы Амангелді және Жангелді аудандарының мектептерінде «Мамандық жәрмеңкесі» атты іс-шарасын ұйымдастырды. Шара болашақ талапкерлердің дұрыс таңдау жасауына ықпал етіп, білім ордамыздағы мамандықтарды насихаттауды көздеді. Директордың тәрбие ісі жөніндегі орынбасары ретінде 9 және 11-сынып түлектерімен кездесіп, колледждегі мамандықтар туралы презентация, бейнебаян көрсетіп, оқушылармен түсіндіру жұмыстарын өткіздім.

Оқушылармен жұмыс істеу – кәсіптік бағдар беру бағыттарының бірі болса, екіншісі – ата-аналармен жұмыс істеу. Сондықтан ата-аналар арасында да түсіндірме жұмыстары жүргізілді. Себебі балаларының мамандық таңдап алуына ата-аналардың ықпалы үлкен болғандықтан, олармен жұмыс нәтижелі болары сөзсіз. Аталған іс-шара колледжіміздің белсенді де өнерлі студенттерінің ұйымдастыруымен шағын концерттік бағдарламамен аяқталды.

Салтанат АХМЕТОВА,
Арқалық политехникалық
колледжі директордың тәрбие
ісі жөніндегі орынбасары