Абай мұрасы – ұрпаққа аманат

Абайдың «Жидебай-Бөрілі» мемлекеттік тарихи-мәдени және әдеби-мемориалдық музей-қорығы мен Қостанай қаласындағы Абай атындағы жалпы білім беретін мектебі арасында өзара ынтымақтастық туралы Меморандумға қол қойылды.

Бұл маңызды құжат қос тараптың білім мен мәдениет салаларындағы өзара іс-қимылын нығайтып, екі мекеме арасында ұзақмерзімді рухани серіктестіктің негізін қалады. Меморандум аясында ұлы ақын, ойшыл Абай Құнанбайұлының мұрасын жас ұрпаққа кеңінен насихаттау, тарихи-мәдени сабақтастықты тереңдету, ғылыми-танымдық жобалар мен шығармашылық кездесулер ұйымдастыру және музей мен мектеп арасындағы оқу-тәжірибелік байланысты арттыру көзделіп отыр.

Іс-шара барысында музей-қорық өкілдері мен білім беру ұйымының педагогтері өзара мәдени серіктестіктің маңыздылығына ерекше тоқталды. Жидебайдан бастау алған бұл рухани көпір – Қостанай өңірінің жас буынына Абай әлемін тереңірек танып-білуге, ұлттық тарих пен әдебиетке қызығушылығын арттыруға берік негіз болады деп күтілуде. Мұндай серіктестік – өскелең ұрпақтың ұлттық құндылықтарға деген қызығушылығын оятып, тарихи жадыны жаңғыртуға сеп болады.
Меморандум – жай ғана ресми келісім емес, ол – ұлттық құндылықтарды ұлықтауға бағытталған үлкен жауапкершілік. Қос мекеме арасында бірлесе атқарылатын жұмыстар – Абай мұрасын болашақ ұрпақ санасына сіңіру жолындағы маңызды әрі мазмұнды бастама болмақ.

Келбет МУРЗАБЕКОВА,
Абай атындағы жалпы
білім беретін мектеп
директордың оқу
жөніндегі орынбасары,
Қостанай қаласы