«Әдеби қолтаңба»: шығармашылық өркендейді

Кітапханалар – өлке мәдениеті мен тарихының сақтаушысы. Рудныйдың орталықтандырылған кітапхана жүйесі бұл бағыттағы жұмысын жандандырып, Жастар ресурстық орталығында тұсаукесері өткен «Әдеби қолтаңба» жобасын жүзеге асыруда.

Жоба әдеби өлкетануды насихаттап, Қостанай облысының ақындары мен прозашыларымен кездесулер өткізу арқылы жергілікті жазушылардың шығармашылығын дәріптеу және мәдени мұраны сақтауды көздейді. «Әдеби қолтаңба» жобасы өңірдің қаламгерлерін біріктіріп, оларға қала тұрғындарымен жақын араласу мүмкіндігін береді. Ал, қала тұрғындары жергілікті ақын-жазушылардың шығармашылығымен таныса алады.
Жастар ресурстық орталығында өткен кездесу жобаның өзектілігі мен маңыздылығының тамаша дәлелі болды. Шақырылған қонақтардың қатарында студенттер мен оқушылардан бөлек «Рудненский меридиан» әдеби бірлестігінің мүшелері (жетекшісі – Татьяна Маркова), қалалық ардагерлер кеңесінің мүшелері Жақсылық Кәкенов, Сүндет Молдашев, музыкант әрі суретші Гвоздева Светлана, сонымен қатар қазақ тілі мен әдебиеті пәнінің мұғалімі Динара Сыздықова болды. Құттықтау сөздерінде олар жобаның маңызына ерекше тоқталып, оның әлеуметтік және мәдени құндылығын атап өтті.
Мерекелік көңіл-күйді «Аққу» би үйірмесі, «Жадыра» халық этно-ұжымының қатысушылары және Ахмет Байтұрсынов атындағы №19 орта мектептің домбырашы оқушылары көтерді. Іс-шара барысында рудныйлық ақындардың өлеңдері және олардың сөзіне негізделген әндер шырқалды. Ал, фойеде ұйымдастырылған ауқымды кітап көрмесі жергілікті авторлардың шығармашылығын жан-жақты таныстырып, шараның поэтикалық атмосферасын толықтырды.
Жобаның алғашқы қадамы жасалды. Оның жүзеге асуы қаладағы білім беру және мәдениет мекемелерінің өлкетану әдебиетін қолдау мен насихаттау бағытындағы күш-жігерін біріктіріп, өскелең ұрпақтың кітап оқуға деген қызығушылығын арттыруға септігін тигізеді деген сенім бар.

Наталья ПАВЛЕЦОВА,
ОҚК қызмет көрсету
бөлімінің меңгерушісі,
Рудный қаласы