«Ақ дариға» хорының 30 жылдығы

Л.Н. Толстой атындағы Қостанай облыстық ғылыми әмбебап кітапханасында өңірдің мәдени келбетіне айналған «Ақ дариға» халықтық хорының 30 жылдығына арналған рухани кеш өтті.

Мерекелік іс-шараның шымылдығы хор ұжымының орындауындағы әуезді халық әндерімен ашылып, жиналған қауымды бірден өнер әлеміне жетеледі. Отыз жылдық тарихы бар ұжымның жүріп өткен жолы, жеткен жетістіктері мен гастрольдік сапарларынан сыр шертетін бейнебаян көрермендерге ерекше әсер сыйлады.

Хор мүшесі, ардагер ұстаз Ақсұлу Бекболатова – 47 жыл ғұмырын ұстаздық жолға арнаған. Кейіпкеріміз мектеп қабырғасынан бері домбыраны серік еткен. Құрметті демалысқа шықса да, ұстазының шақыруымен хор құрамына қосылып, бүгінде өнер биігінен көрініп жүр. «Өнер мен білім – егіз. Бүгінде жолымды қызым мен немерем жалғап келеді. Әулетімізде ұстаздықтың үш ұрпағы қалыптасқан», – дейді Ақсұлу Тұяққызы.
«Ақ дариға» ұжымының басты миссиясы – ұмытыла бастаған халық әндерін қайта жаңғырту, өңірлік өнерді насихаттау және қариялардың белсенді өмір сүруіне жағдай жасау. Осы жылдар ішінде хор ұжымы облыстық, республикалық деңгейдегі көптеген мәдени іс-шаралардың сәніне айналды. Кеш барысында хор жетекшісі Арыстанбай Өмірзақовтың қажырлы еңбегі ерекше атап өтілді. Көрермендер жетекшінің кәсіби шеберлігіне тәнті болып, жылы лебіздерін білдірді.
Іс-шара соңында өнерпаздар ұжымы туған жерге деген сүйіспеншілікті паш ететін «Қостанай» әнін шырқады. Көрермендердің ыстық ықыласы мен ду қол шапалағына толы болған кеш ұлттық өнердің құдіретін тағы бір мәрте дәлелдегендей болды.

Айгерім БАХИТБЕК,
А.Байтұрсынұлы атындағы
ҚӨУ журналистика
мамандығының
3-курс студенті