Ақтаңгер ақынмен кездесу

Данышпан қазақ халқы ақынға кенде болған жоқ. Соның бір жарқын үлгісімен жастарды тілдестіру мақсатында «Төрт тоқсан – төрт өнер» ұлттық мәдени-ағартушылық жобасының «Ақындар айтысы» бөлімінің шеңберінде Айбек Қалиевпен кездесу кеші өтті.

Халықтың рухани мұратына қызмет еткен ұлы тұлғалар аз емес. Жырға бай Торғай өңірі – қазақ өлеңіне үлкен үлес қосқан талай тарлан дарындар шыққан жер. Ахмет Байтұрсынұлы, Міржақып Дулатұлы, Сырбай Мәуленов, Ғафу Қайырбеков сынды басқа да алып тұлғалар қазақ жырының мерейін аспандатқан. Нұрхан мен Қонысбай ағалардың ізін жалғап, ел руханиятын түгендеген өнер мен мәдениет жанашыры – Айбек Киікбайұлы Қалиев.

Тағылымды кеш барысында Айбек Киікбайұлы ақындық өнерге келу жолы, балалық шағы, айтыс өнеріндегі алған белестері туралы әңгімелеп берді. Келген қонақтар ақтаңгер ақынға көкейіндегі сұрақтарын қойып, тұшымды жауабын ала білді. Іс-шара барысында жиналғандар ақынға қолқа салып, өнерін тамашалады. Артынша оқушылар да ақынға арнау айтып, өлең жолдарын оқып берді. Жастардың өнеріне риза болған Айбек Киікбайұлы оларға ағалық ақыл-кеңесін білдірді. Кеш қонағына орталық директоры Зауреш Мақсұтқызы жылы лебізін білдіріп, Алғыс хат табыстады.

«Ақынын құрметтеген ел озады, ақынын сыйламаған ел тозады» дейді. Ақындығы мен ұстамдылығы үйлесім тапқан Айбек Киікбайұлындай еліміздің мақтанышына айналған тұлғаға қандай құрмет көрсетсек те артық етпес. Тәлімді адамдармен кездесіп, тәрбиесін берер осындай кездесу кештері орталығымызда жалғасын таба бермек.

Ерлан АБДУАЛИЕВ,
Н.Тойшин,
Қосымша білім беру
орталығының
педагогтері,
Арқалық қаласы